“ఓరి దేవుడా! గ్యాలరీలో మ్యాచ్ చూస్తున్న అభిమాని.. భుజంపైకి దూకిన కోతి..!” మెడపై కొరికిన దారుణం.. భద్రతా లోపాలపై మండిపడుతున్న జనాలు.. షాకింగ్ వీడియో..!!

కోల్‌కతాలోని సాల్ట్ లేక్ స్టేడియంలో భారత్, ఉరుగ్వే జట్ల మధ్య జరుగుతున్న అంతర్జాతీయ ఫుట్‌బాల్ (ఫ్రెండ్లీ) మ్యాచ్‌లో ఊహించని పరిణామం చోటుచేసుకుంది. అకస్మాత్తుగా స్టేడియంలోకి దూసుకొచ్చిన ఓ కోతి అభిమానిపై దాడి చేసిన ఘటన తీవ్ర కలకలం రేపింది.

గ్యాలరీలో కూర్చుని ఆసక్తిగా మ్యాచ్ చూస్తున్న ఓ అభిమాని భుజంపై ఒక్కసారిగా ఓ కోతి దూకింది. రెప్పపాటు వ్యవధిలో అతని మెడపై కొరకడానికి ప్రయత్నించింది. భయంతో వణికిపోయిన ఆ వ్యక్తి వెంటనే కోతిని తరిమికొట్టేందుకు ప్రయత్నించినప్పటికీ, అది అతని మెడపై కరిచి అక్కడి నుంచి పారిపోయింది. ఈ భయానక దృశ్యాలు వీడియోలో రికార్డయ్యాయి.

వేలాది మంది అభిమానులు ఉన్న అంతర్జాతీయ క్రీడా మైదానంలోకి కోతి అసలు ఎలా ప్రవేశించిందనే ప్రశ్నలు తలెత్తుతున్నాయి. స్టేడియంలో కనీస భద్రతా ఏర్పాట్లు, లోపాలపై క్రీడాభిమానులు, ప్రజలు తీవ్ర ఆగ్రహం వ్యక్తం చేస్తున్నారు.

కాగా, ఈ మ్యాచ్‌లో ఉరుగ్వే జట్టు 6-1 గోల్స్ తేడాతో భారత్‌ను చిత్తుగా ఓడించింది. మైదానంలో ఊహించని విధంగా జరిగిన ఈ కోతి దాడి వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.