తండ్రిని కోల్పోయినా.. కుటుంబానికి అండగా నిలవాలనుకున్నాడు! ఆదివారం చేపలు అమ్ముతూ కుటుంబానికి సాయం చేస్తున్న 16 ఏళ్ల బాలుడిని మృత్యువు కారు రూపంలో కబళించింది. ప్రమాదానికి గురైన కారులో తనిఖీలు చేయగా, పోలీసులు ఊహించని దృశ్యం కనిపించింది.
తమిళనాడులోని తిరుచ్చి జిల్లా, మణప్పారై సమీపంలో ఘోర రోడ్డు ప్రమాదం జరిగింది. ఈ ప్రమాదంలో 11వ తరగతి చదువుతున్న 16 ఏళ్ల జాన్సన్ అనే విద్యార్థి ప్రాణాలు కోల్పోయాడు.
కరట్టుపట్టి కరుంగుళం ప్రాంతానికి చెందిన జాన్సన్ స్థానిక పాఠశాలలో 11వ తరగతి చదువుతున్నాడు. తండ్రిని కోల్పోవడంతో కుటుంబానికి ఆర్థికంగా అండగా నిలవాలనే ఉద్దేశంతో ఆదివారాల్లో చేపలు అమ్ముతూ సాయం చేసేవాడని సమాచారం.
ఈ క్రమంలో ఆదివారం ఉదయం దిండిగల్–తిరుచ్చి జాతీయ రహదారిపై చేపలు అమ్ముతున్న సమయంలో, దిండిగల్ నుంచి చెన్నై వైపు వెళ్తున్న ఓ కారు అదుపుతప్పి రోడ్డు మధ్యలోని డివైడర్‌ను ఢీకొట్టింది. అనంతరం రహదారి పక్కన ఉన్న జాన్సన్‌తో పాటు మరికొందరిని ఢీకొట్టింది.
ఈ ప్రమాదంలో జాన్సన్ సుమారు 50 అడుగుల దూరం ఎగిరిపడి అక్కడికక్కడే మృతి చెందాడు. మరో ముగ్గురు గాయపడ్డారు.
సమాచారం అందుకున్న పోలీసులు ఘటనాస్థలానికి చేరుకుని విచారణ చేపట్టారు. ప్రమాదానికి గురైన కారును తనిఖీ చేయగా, అందులో పలు రకాల జీవులు కనిపించడంతో పోలీసులు ఆశ్చర్యపోయారు.
కారులో పాములు, ఎలుకలు, ఊసరవెల్లులు, తేళ్లు, కుక్క, కప్పలు, నత్తలు వంటి జీవులను వేర్వేరు డబ్బాల్లో ఉంచినట్లు సమాచారం. ప్రమాదంపై దర్యాప్తు చేస్తున్న సమయంలో కారులో ఇన్ని రకాల జీవులు కనిపించడంతో పోలీసులు అటవీశాఖ అధికారులకు సమాచారం అందించారు.
దీంతో మణప్పారై అటవీశాఖ అధికారులు కారులో ప్రయాణిస్తున్న ఇద్దరిని విచారించారు. వారు చెన్నైలో పనిచేస్తున్నారని, తూత్తుకుడిలో జరిగిన ఓ ప్రదర్శనలో పాములు సహా పలు జీవులను ప్రదర్శనకు ఉంచిన అనంతరం తమ స్వస్థలమైన దిండిగల్‌కు తిరిగి వెళ్తున్నట్లు ప్రాథమిక విచారణలో వెల్లడైనట్లు సమాచారం.
అయితే, ఆ జీవులను తరలించేందుకు అవసరమైన అనుమతులు తీసుకున్నారా? వాటిని ఏ ప్రయోజనం కోసం తీసుకెళ్తున్నారు? అనే అంశాలపై అటవీశాఖ అధికారులు విచారణ కొనసాగిస్తున్నారు.
ఒకవైపు కుటుంబానికి అండగా నిలవాలని ప్రయత్నించిన చిన్న వయసు విద్యార్థి రోడ్డు ప్రమాదంలో ప్రాణాలు కోల్పోవడం విషాదాన్ని నింపగా, మరోవైపు ప్రమాదానికి గురైన కారులో వివిధ రకాల జీవులు బయటపడటం స్థానికంగా చర్చనీయాంశంగా మారింది.
Leave a Reply