గత 12 ఏళ్లుగా పక్షవాతం కారణంగా వీల్‌చైర్‌కే పరిమితమైన లెబనాన్ దేశానికి చెందిన జెస్సికా టావిల్ (Jessica Tawil) అనే యువతి, సరికొత్త రోబోటిక్ పరికరం సాయంతో ఇన్నేళ్ల తర్వాత తొలిసారిగా లేచి నిలబడి కొన్ని అడుగులు వేసిన హృదయపూర్వక దృశ్యం నెటిజన్లను ఎంతగానో కదిలిస్తోంది.
2014లో తన 16వ ఏట జరిగిన ఓ ఘోర రోడ్డు ప్రమాదంలో ఆమె వెన్నుపాము తీవ్రంగా దెబ్బతింది. దీంతో నడుము కింది భాగం పూర్తిగా చచ్చుబడిపోవడంతో (పారాలసిస్), అప్పటినుంచి ఆమె వీల్‌చైర్‌లోనే జీవనం సాగిస్తోంది.
తాజాగా ‘ఈవ్’ (Eve) అనే ధరించదగిన రోబోటిక్ ఎక్సోస్కెలిటన్ (Exoskeleton) పరికరం సాయంతో ఆమె సొంతంగా లేచి నిలబడి నడిచింది. ఆ సమయంలో పట్టరాని ఆనందంతో భావోద్వేగానికి లోనవుతూ “ఓ మై గాడ్!” అని కన్నీళ్లు పెట్టుకున్న క్షణాలు ఇన్‌స్టాగ్రామ్‌లో వీడియో రూపంలో పోస్ట్ కావడంతో క్షణాల్లో వైరల్‌గా మారాయి.
ఈ రోబోటిక్ పరికరం వల్ల ఆమెకు పక్షవాతం పూర్తిగా నయమైపోయిందని అర్థం కానప్పటికీ.. ఆధునిక సాంకేతికత అండతో ఆమె స్వతంత్రంగా లేచి నిలబడేందుకు, ఇతరుల భరోసాతో అడుగులు ముందుకు వేసేందుకు ఈ డివైజ్ ఎంతగానో ఉపయోగపడింది.
అమెరికా ఆహార, ఔషధ నియంత్రణ సంస్థ (FDA) నుంచి అధికారిక ఆమోదం పొందిన ఈ ‘ఈవ్’ పరికరం.. దివ్యాంగుల జీవితాల్లో సరికొత్త స్వేచ్ఛను, నడకపై కొత్త ఆశలను నింపేందుకు ఇలాంటి సాంకేతికతలు ఎంతలా ఉపయోగపడతాయో జెస్సికా అనుభవం స్పష్టం చేస్తోంది.
Leave a Reply