“ఉదయం 9 గంటలకు పరోటా.. ఆ వెంటనే పాస్తా, పండ్లు, పానీపూరి, సమోసా..! రోజూ ఆఫీస్‌లో 9 సార్లు లాగించేస్తున్న వ్యక్తి.. వైరల్ లంచ్ బాక్స్ వీడియో చూసి అవాక్కవుతున్న నెటిజన్లు..!”

సాధారణంగా ఆఫీసులకు వెళ్లే ఉద్యోగులు ఉదయం హడావుడిగా ఏదో ఒకటి తిని వెళ్లిపోయి, మళ్లీ మధ్యాహ్నం లంచ్ సమయం కోసమే ఎదురుచూస్తుంటారు.

కానీ, సోషల్ మీడియాలో విపరీతంగా వైరల్ అవుతున్న ఓ ఉద్యోగి ఆఫీస్ డైట్ పద్ధతి అందరినీ ఆశ్చర్యానికి గురిచేస్తోంది. ల్యాప్‌టాప్, ఆఫీస్ ఫైళ్లతో పాటు వరుసగా రకరకాల ఫుడ్ బాక్సులను టేబుల్‌పై పెట్టుకుని, గంటకోసారి ఏదో ఒకటి తింటూనే ఉన్న అతని వీడియో ప్రస్తుతం నెట్టింట తెగ హల్‌చల్ చేస్తోంది.

ఈ వీడియోలో కనిపిస్తున్న వ్యక్తి పేరు నీరజ్ భాటియా. ఇతను తన ఇన్‌స్టాగ్రామ్ ఖాతాలో ఇంట్లో, ఆఫీస్‌లో తను తినే ఆహారానికి సంబంధించిన వీడియోలను నిరంతరం పోస్ట్ చేస్తుంటాడు. ఈయన చేసిన ఒక వీడియోకు ఇన్‌స్టాగ్రామ్‌లో 2 కోట్లకు పైగా వ్యూస్, ఎక్స్ (ట్విట్టర్) వేదికగా 22 లక్షలకు పైగా వీక్షణలు వచ్చాయని కథనాలు పేర్కొన్నాయి.

నీరజ్ డైట్ షెడ్యూల్ ప్రతిరోజూ ఉదయం 9 గంటలకు పనీర్ పరోటాతో మొదలవుతుంది. ఆ తర్వాత ఉదయం 10 గంటలకు మ్యాకరోనీ, 11 గంటలకు నల్ల శనగలు, మధ్యాహ్నం 12 గంటలకు తాజా పండ్లు తింటాడు. మధ్యాహ్నం 12:30 గంటలకు ఆపిల్ సైడర్ వెనిగర్ తాగి, ఒంటి గంటకు సప్లిమెంట్స్ తీసుకుంటాడు. అనంతరం మధ్యాహ్నం 1:30 గంటలకు అన్నం, పప్పు, సలాడ్ వంటి పదార్థాలతో పూర్తిస్థాయి భోజనం చేస్తాడు.

మధ్యాహ్న భోజనంతో అతని తిండి ప్రస్థానం ముగిసిపోదు. మధ్యాహ్నం 2:30 గంటలకు గోల్‌గప్పా (పానీపూరి) తినడానికి వెళ్లే ఇతను, 3:30 గంటలకు గ్రీన్ టీ తాగి, సాయంత్రం 4:30 గంటలకు సమోసా లాగించేస్తాడు. ఇలా దాదాపు ఎనిమిది గంటల ఆఫీస్ పనివేళల్లో ఏకంగా తొమ్మిది సార్లు ఏదో ఒకటి తింటూ ఉన్న ఈ వీడియోను చూసిన నెటిజన్లు.. “అసలు ఇంత తినడానికి సమయం ఎక్కడ దొరుకుతోంది భయ్యా?” అంటూ ఆశ్చర్యంతో కామెంట్ల వర్షం కురిపిస్తున్నారు.