ఢిల్లీలో జరిగిన ఓ ఆందోళన సందర్భంగా వార్తలు సేకరిస్తున్న మహిళా జర్నలిస్టులపై ఢిల్లీ పోలీసులు దాడికి, లైంగిక వేధింపులకు పాల్పడ్డారనే ఆరోపణలు వచ్చాయి.
దీనికి సంబంధించి బాధిత మహిళా జర్నలిస్టులకు రక్షణ కల్పించాలని, స్వతంత్ర దర్యాప్తు కమిటీని ఏర్పాటు చేయాలని కోరుతూ సీనియర్ న్యాయవాది ఇందిరా జైసింగ్ సుప్రీంకోర్టులో పిటిషన్ దాఖలు చేశారు.
ఈ పిటిషన్ సుప్రీంకోర్టు న్యాయమూర్తులు సూర్యకాంత్, జామాలా బాగ్చీలతో కూడిన ధర్మాసనం ముందు విచారణకు వచ్చింది. విచారణ సందర్భంగా కేంద్ర ప్రభుత్వం తరఫున హాజరైన సొలిసిటర్ జనరల్ తుషార్ మెహతా వాదిస్తూ, “ప్రస్తుత డిజిటల్ టెక్నాలజీ యుగంలో మొబైల్ ఫోన్ ఉన్న ప్రతి వ్యక్తీ తనను తాను ఇండిపెండెంట్ లేదా పార్ట్ టైమ్ జర్నలిస్టుగా చెప్పుకుంటున్నారు.
ఇందులో అసలైన జర్నలిస్టులు ఎవరు, కేవలం రీల్స్ చేసి సంచలనం సృష్టించి డబ్బు సంపాదించేవారు ఎవరో గుర్తించడం సాధ్యం కావడం లేదు” అని పేర్కొన్నారు. దీనిపై స్పందించిన న్యాయవాది ఇందిరా జైసింగ్, పోలీసులపై ఉన్న కేసులను వారే విచారించుకోలేరు కాబట్టి నిష్పక్షపాతమైన కమిటీ అవసరమని నొక్కిచెప్పారు.
ఇరువర్గాల వాదనలు విన్న న్యాయమూర్తి సూర్యకాంత్, “మనం ఒక ముఖ్యమైన విషయాన్ని గుర్తుంచుకోవాలి. దేశంలో ఉన్న అందరూ తమను తాము జర్నలిస్టులుగా ప్రకటించుకోవడం ప్రారంభిస్తే, అది సమాజంలో అందరికీ పెద్ద సమస్యలనే సృష్టిస్తుంది” అని సంచలన వ్యాఖ్యలు చేశారు.
అనంతరం న్యాయమూర్తి జామాలా బాగ్చీ మాట్లాడుతూ, “భావప్రకటనా స్వేచ్ఛ హక్కు, దేశంలోని ప్రతి పౌరుడిని జర్నలిస్టుగా మార్చేస్తుందా అనే దానిపై మనం లోతుగా విశ్లేషించాలి. గుర్తింపు పొందిన జర్నలిస్టులు, రిజిస్టర్ అయిన మీడియా సంస్థల ఉద్యోగులు, ఇండిపెండెంట్ జర్నలిస్టులు, ఇన్‌ఫ్లుయెన్సర్లు లేదా రీల్స్ చేసేవారు ఇలా పలు వర్గాలు ఉన్నాయి.
ఇందులో ఏ నిర్దిష్ట వర్గానికి అదనపు చట్టపరమైన రక్షణ కల్పించాలనే దానిపై సమగ్ర పరిశీలన అవసరం” అని ఆయన ఎత్తిచూపారు. విచారణ ముగింపులో, మహిళా జర్నలిస్టులపై వేధింపుల ఆరోపణలను విచారించేందుకు ప్రత్యేక దర్యాప్తు బృందాన్ని ఏర్పాటు చేసే అంశాన్ని పరిశీలిస్తామని సుప్రీంకోర్టు తెలిపింది. అంతేకాకుండా, ఫిర్యాదు చేసిన మహిళా జర్నలిస్టును అరెస్టు చేయకూడదని, ఆమెపై ఎలాంటి కఠిన చర్యలు తీసుకోకూడదని ఢిల్లీ పోలీసులకు మధ్యంతర ఉత్తర్వులు జారీ చేస్తూ కోర్టు ఆదేశించింది.
Leave a Reply