హిందూ దేవాలయాన్ని లక్ష్యంగా చేసుకుని ఇలాంటి కుట్రనా..! 19 ఏళ్ల యువకుడి దురాలోచన.. హిందువులను చంపేందుకు ప్లాన్ చేశాడన్న వార్తతో ఉలిక్కిపాటు.. గుడిపై దాడికి ఎందుకు ప్లాన్ చేశాడంటే..

అమెరికాలోని ఇల్లినాయిస్ రాష్ట్రంలో, హిందూ దేవాలయాన్ని లక్ష్యంగా చేసుకుని కాల్పులు జరిపేందుకు కుట్ర పన్నాడనే ఆరోపణలతో 19 ఏళ్ల యువకుడిని అరెస్టు చేశారు.

భారతీయుల పట్ల విపరీతమైన ద్వేషం పెంచుకున్న ఆ యువకుడి ప్లాన్, ఓ తోటి ఉద్యోగి ఇచ్చిన సమాచారంతో పోలీసుల దృష్టికి వచ్చింది. ఈ ఘటన అమెరికాలో నివసిస్తున్న భారత సంతతి ప్రజలు, హిందూ సమాజంలో తీవ్ర ఆందోళన రేకెత్తించింది.

అలెగ్జాండ్రోస్ పపోరాకిస్ అనే ఆ యువకుడు, పలు జాతుల ప్రజలకు వ్యతిరేకంగా ద్వేషపూరిత వ్యాఖ్యలు చేసినట్లు దర్యాప్తు అధికారులు తెలిపారు. ముఖ్యంగా భారతీయులను చంపాలనే తన ఉద్దేశాన్ని తోటి ఉద్యోగులతో పంచుకున్నట్లు చెబుతున్నారు. అంతేకాకుండా, దాడి చేయడానికి సంబంధించిన ప్లాన్ ఉన్నట్లు భావిస్తున్న పత్రాలను, తుపాకీ మరియు రక్షణ పరికరాల ఫోటోలను కూడా అతను ఇతరులకు షేర్ చేశాడని ఆరోపణలు వచ్చాయి. ఆ పత్రంలో జాత్యహంకార, ఉగ్రవాద భావజాలాలు ఉన్నట్లు అధికారులు వెల్లడించారు.

అక్టోబర్ 11వ తేదీన, ఇల్లినాయిస్ రాష్ట్రంలోని అరోరా (Aurora) ప్రాంతంలో ఉన్న హిందూ దేవాలయం వైపు అతడు వెళ్లాడని, ఆ సమయంలో అతని వద్ద తుపాకీ, బుల్లెట్లు, రక్షణ దుస్తులు ఉన్నాయని విచారణలో తేలింది. అయితే, అతడు తుపాకీని ఉపయోగించేందుకు ప్రయత్నించినప్పుడు అది మొరాయించడంతో (పనిచేయకపోవడంతో) దాడి జరగలేదని మీడియా కథనాలు చెబుతున్నాయి. ఆ తర్వాత తుపాకీని ఎలా బాగు చేయాలో ఇంటర్నెట్‌లో వెతకడంతో పాటు, తన ప్లాన్ గురించి తోటి ఉద్యోగితో కూడా మాట్లాడినట్లు సమాచారం. దీంతో అనుమానం వచ్చిన ఆ ఉద్యోగి పోలీసులకు సమాచారం అందించాడు.

దీంతో రంగంలోకి దిగిన పోలీసులు అతడిని అరెస్టు చేసి, అతని ఇంట్లో సోదాలు నిర్వహించారు. ఆ సమయంలో తుపాకీ, పలు బుల్లెట్లు, ఆయుధాలకు సంబంధించిన సామగ్రి, నాజీ గుర్తులు ఉన్న వస్తువులను స్వాధీనం చేసుకున్నట్లు అధికారులు తెలిపారు. అంతేకాకుండా, ఈ కుట్రకు సంబంధించిన దర్యాప్తులో అమెరికా దర్యాప్తు సంస్థ ఎఫ్‌బీఐ (FBI) కూడా పోలీసులకు సహాయం చేస్తోంది. ఉగ్రవాద ముప్పు హెచ్చరికలు జారీ చేయడం, అక్రమంగా ఆయుధాలు కలిగి ఉండటం వంటి అభియోగాలు అతనిపై నమోదయ్యాయి. ఈ కేసులో తదుపరి విచారణ కొనసాగుతోంది.