ఉత్తరప్రదేశ్ రాష్ట్రం బిజ్నోర్ జిల్లాలోని నహతూర్ ప్రాంతంలో రోడ్డు పక్కన ఉన్న ట్రాన్స్‌ఫార్మర్‌ను ఒక ఆయిల్ ట్యాంకర్ (లారీ) ఢీకొట్టిన ప్రమాదం తీవ్ర కలకలం రేపింది.
నహతూర్ ప్రాంతంలోని ఫూల్‌సదా గ్రామంలో అక్టోబర్ 13వ తేదీ రాత్రి ఈ ఘటన చోటుచేసుకుంది.
అదుపుతప్పిన ఒక ఆయిల్ లారీ అకస్మాత్తుగా ట్రాన్స్‌ఫార్మర్‌ను బలంగా ఢీకొట్టడంతో, విద్యుత్ స్తంభాలు విరిగిపడటంతో పాటు మంటలు (నిప్పురవ్వలు) చెలరేగాయి. రాత్రి సమయం కావడంతో ఆ ప్రాంతంలో జనసంచారం తక్కువగా ఉంది. ఈ ప్రమాద సమయంలో ఆ ట్రాన్స్‌ఫార్మర్ లారీ ముందు భాగంలో (ఛాంబర్‌లో) ఇరుక్కుపోయింది.
అది గమనించిన లారీ డ్రైవర్, దానిని అక్కడే వదిలేయకుండా, ఆ ట్రాన్స్‌ఫార్మర్‌తో పాటే లారీని నజీబాబాద్ ప్రాంతంలోని ఇండియన్ ఆయిల్ డిపో వరకు నడుపుకుంటూ వెళ్లిపోయాడు. తెల్లవారుజామున గ్రామంలో కరెంట్ లేకపోవడంతో ఆశ్చర్యపోయిన ప్రజలు బయటికి వచ్చి చూడగా.. అక్కడ ట్రాన్స్‌ఫార్మర్ కనిపించకపోవడంతో అవాక్కయ్యారు.
దీంతో విద్యుత్ శాఖ అధికారులు ఆ ప్రాంతంలోని సీసీటీవీ (CCTV) కెమెరాలను పరిశీలించగా ఈ విచిత్రమైన నిజం బయటపడింది. లారీ డ్రైవర్ ట్రాన్స్‌ఫార్మర్‌తో సహా లారీని నడుపుకుంటూ వెళ్లిన దృశ్యాలు అందులో స్పష్టంగా రికార్డయ్యాయి. వెంటనే నజీబాబాద్ విద్యుత్ శాఖ అధికారులకు సమాచారం అందించి, ఆయిల్ డిపోకు వెళ్లి లారీలో ఇరుక్కున్న ఆ ట్రాన్స్‌ఫార్మర్‌ను రికవరీ చేశారు.
అనంతరం విద్యుత్ శాఖ సిబ్బంది అదే స్థలంలో కొత్త ట్రాన్స్‌ఫార్మర్‌ను, విద్యుత్ స్తంభాలను పలు గంటలపాటు శ్రమించి తిరిగి ఏర్పాటు చేశారు.
ఆ తర్వాతే ఆ గ్రామానికి విద్యుత్ సరఫరా పూర్తిగా పునరుద్ధరించబడింది. ప్రమాదం చేయడమే కాకుండా, ట్రాన్స్‌ఫార్మర్‌ను లారీతో పాటే ఎత్తుకెళ్లిన డ్రైవర్ చర్య ఆ ప్రాంతంలో తీవ్ర ఆశ్చర్యంతో పాటు నవ్వులు పూయిస్తోంది.
Leave a Reply