కేరళ రాష్ట్రం త్రిసూర్ జిల్లా వలపాడు తీర ప్రాంతం (బీచ్) సమీపంలో, ఒక లారీ డ్రైవర్ తన భార్యను, ఏడాదిన్నర వయసున్న బిడ్డను గొంతు కోసి దారుణంగా హత్య చేసిన ఘటన ఆ ప్రాంతంలో తీవ్ర దిగ్భ్రాంతిని కలిగించింది.
ఈ హత్యకు గల కారణాలపై ప్రస్తుతం పలు షాకింగ్ విషయాలు వెలుగులోకి వచ్చాయి.
వలపాడుకు చెందిన లారీ డ్రైవర్ విజేష్‌కు, విస్మయ (18) అనే యువతికి మధ్య తలెత్తిన కుటుంబ కలహాలే ఈ జంట హత్యలకు కారణమని చెబుతున్నారు. భార్యాభర్తల మధ్య ఉన్న అనుమానమే ఈ దారుణ నిర్ణయానికి దారితీసిందని పోలీసులు తెలిపారు.
విస్మయకు కేవలం 18 ఏళ్లు మాత్రమే కాగా, ఆమె తనకంటే 20 ఏళ్లు పెద్దవాడైన విజేష్‌ను వివాహం చేసుకుంది. ఈ వయసు వ్యత్యాసం కారణంగా పెళ్లైనప్పటి నుంచే ఇద్దరి మధ్య మనస్పర్థలు ఉన్నాయి. వివాహం తర్వాత విజేష్ ఇంట్లో ఉండటానికి ఇష్టపడని విస్మయ, వలపాడులోని తన పుట్టింట్లో తల్లి, సోదరుడితో కలిసి నివసిస్తోంది. విజేష్ వారానికి రెండుసార్లు అక్కడికి వచ్చి వెళుతుండేవాడు.
కాలక్రమేణా వీరి మధ్య తరచుగా గొడవలు జరుగుతుండటంతో, విస్మయ విడాకులు తీసుకుని విడిపోవాలని నిర్ణయించుకుంది. కానీ, 40 ఏళ్లు పైబడిన విజేష్ ఇందుకు అంగీకరించకుండా, సమస్యలను మాట్లాడుకుని పరిష్కరించుకుందామని, కలిసే ఉందామని పట్టుబట్టాడు.
ఈలోగా, తన తండ్రిని ఆసుపత్రికి తీసుకెళ్లిన సమయంలో ఒక అంబులెన్స్ డ్రైవర్‌తో విస్మయకు పరిచయం ఏర్పడిందని, అది సన్నిహితంగా మారిందని వదంతులు వ్యాపించాయి. దీంతో విజేష్‌కు తన భార్యపై అనుమానం మరింత బలపడింది.
కుటుంబ కలహాలు ముదరడంతో విస్మయ ఒక మానసిక వైద్యుడి వద్ద చికిత్స తీసుకుంటోంది. ఈ క్రమంలో, విస్మయ తల్లి, సోదరుడు ఆమెను సురక్షితమైన మహిళా సంరక్షణ, కౌన్సెలింగ్ కేంద్రానికి మార్చడానికి ప్రయత్నించారు.
దీనికి సంబంధించి రెండు కుటుంబాల వారు పోలీస్ స్టేషన్‌కు వెళ్లి ఫిర్యాదు చేశారు. అయితే, కేంద్రానికి వెళ్లడానికి విస్మయ నిరాకరించడంతో, పోలీసులు ఆమెను బలవంతంగా పంపలేకపోయారు. ఎలాంటి గొడవలు లేకుండా ప్రశాంతంగా జీవించాలనే అవగాహనతో ఇరువర్గాలు పోలీస్ స్టేషన్ నుంచి బయలుదేరాయి.
పోలీస్ స్టేషన్ నుంచి విజేష్, విస్మయ ఇద్దరూ వలపాడులోని విస్మయ ఇంటికి వెళ్లారు. అర్ధరాత్రి వరకు ఎలాంటి సమస్యా లేదని విస్మయ తల్లి పోలీసులకు తెలిపింది. కానీ, అర్ధరాత్రి దాటిన తర్వాత వారి గది నుంచి కేకలు వినిపించాయి. గదిలోని బీరువాలో దాచిన పదునైన కత్తిని తీసుకున్న విజేష్, విస్మయను, వారి పసిబిడ్డ దక్షను అత్యంత దారుణంగా గొంతు కోసి చంపేశాడు.
కుటుంబ కలహాలు, అనుమానం కారణంగా కట్టుకున్న భార్యను, కన్న బిడ్డను భర్తే స్వయంగా మట్టుబెట్టిన ఈ ఘటన త్రిసూర్ జిల్లాను కుదిపేసింది.
Leave a Reply