భారతీయ గ్రామీణ జీవితాన్ని స్వయంగా అనుభవించిన ఓ జర్మన్ దౌత్యాధికారి వీడియో ప్రస్తుతం సోషల్ మీడియాలో వైరల్‌గా మారింది. సాధారణంగా కోటు, సూటుతో అధికారిక కార్యక్రమాల్లో కనిపించే ఆయన.. ఈసారి గ్రామంలోకి వెళ్లి రైతుతో కలిసి వ్యవసాయ పనులు చేస్తూ అందరినీ ఆకట్టుకున్నారు.
భారత్‌లోని జర్మన్ రాయబార కార్యాలయంలో రాజకీయ వ్యవహారాల విభాగానికి నాయకత్వం వహిస్తున్న మారియస్ ఓస్వాల్డ్ (Marius Oswald), ఢిల్లీ నుంచి ఓ గ్రామానికి వెళ్లి ప్రమోద్ శర్మ అనే రైతును కలిసినట్లు కథనం పేర్కొంది.
గ్రామంలో ఎండ తీవ్రత ఎక్కువగా ఉందని ఓస్వాల్డ్ చెప్పడంతో.. గ్రామీణ జీవితాన్ని నిజంగా అనుభవించి చూడాలని రైతు ఆయనకు సవాల్ విసిరినట్లు సమాచారం. దీంతో తన పైకోటును తీసేసి, మెడలో కండువా వేసుకున్న ఆయన.. రైతుతో కలిసి పశువుల కొట్టం వైపు వెళ్లారు.
గడ్డి కోయడం నుంచి పేడ ఎత్తడం వరకు..
పశువులకు మేత సిద్ధం చేసే యంత్రాన్ని స్వయంగా నడిపిన ఓస్వాల్డ్, ఆ తర్వాత వాటికి గడ్డి వేశారు. అనంతరం పశువుల పేడను శుభ్రం చేయాలని రైతు చెప్పడంతో మొదట ఆయన కొంత సంకోచించినట్లు కథనం వెల్లడించింది.
అయితే, పశువులు కుటుంబ సభ్యుల్లాంటివని, వాటి కొట్టాన్ని శుభ్రం చేయడంలో ఎలాంటి తప్పు లేదని రైతు వివరించారు. దీంతో ఓస్వాల్డ్ తన సంకోచాన్ని పక్కనపెట్టి, చేతులకు గ్లౌజులు కూడా ధరించకుండా పేడను చేతులతోనే ఎత్తి శుభ్రం చేసినట్లు వీడియోలో కనిపిస్తోంది.
ఈ దృశ్యాలతో కూడిన వీడియోను భారత్‌లోని జర్మన్ రాయబార కార్యాలయం తన సోషల్ మీడియా ఖాతాలో షేర్ చేసింది.
భారత్‌–జర్మనీ సంబంధాలపై ఆసక్తికర సందేశం!
భారతీయులు జర్మనీలో విజయవంతంగా పనిచేయాలని కోరుకుంటే, జర్మన్లు కూడా భారత్‌లో విజయవంతంగా పనిచేయగలరని తమ ఆచరణ ద్వారా చూపించాలని ఆ పోస్టులో సందేశం ఇచ్చినట్లు కథనం పేర్కొంది.
ఈ వీడియో బయటకు వచ్చిన తర్వాత గ్రామీణ జీవితాన్ని ఎలాంటి భేషజాలు లేకుండా అనుభవించిన జర్మన్ అధికారిపై పలువురు ప్రశంసలు కురిపిస్తున్నారు. ఒక విదేశీ దౌత్యాధికారి రైతు నిత్యజీవితంలో భాగమై వ్యవసాయ పనులు చేయడం.. భారతీయ సంస్కృతిని అర్థం చేసుకోవాలనే ఆసక్తిని, ప్రజలతో సన్నిహిత సంబంధాలు పెంచుకోవాలనే ప్రయత్నాన్ని ప్రతిబింబిస్తోందని నెటిజన్లు అభిప్రాయపడుతున్నారు.
Leave a Reply