“మంచి మనసుకు ఇంతటి పరీక్షా?”.. ఒంటిచేత్తో నదిని శుభ్రం చేసిన విద్యార్థికి ఎదురైన చేదు అనుభవం! పర్యావరణాన్ని కాపాడేందుకు పోరాడిన యువకుడికి ఏమైంది..?!!

మధ్యప్రదేశ్‌లో నదిని ఒంటరిగా శుభ్రం చేసి ఎందరి నుంచో ప్రశంసలు అందుకున్న 20 ఏళ్ల విద్యార్థి బిట్టు సింగ్‌కు తాజాగా విస్తుపోయే అనుభవం ఎదురైంది.

సురేంద్ర సింగ్ చౌదరి అసలు పేరు కలిగిన ఈ యువకుడు, రాజ్‌గఢ్ జిల్లా బ్యావ్రా పరిధిలోని అజ్నార్ నదిని శుభ్రపరిచే బృహత్కార్యంలో నిమగ్నమయ్యాడు. స్థానికులు ప్లాస్టిక్ తదితర వ్యర్థాలను నదిలో వేస్తుండటంతో, అతడు శుభ్రం చేసిన చోటే మళ్లీ మళ్లీ చెత్తాచెదారం పేరుకుపోయింది. అయినప్పటికీ అధైర్యపడకుండా నదిని మళ్లీ శుభ్రం చేసిన అతడు, ఇకపై నదిలో ఎవరూ చెత్త వేయకుండా నిరోధించేందుకు ఒక సరికొత్త ప్రయత్నాన్ని ప్రారంభించాడు.

ప్రజలు ఉపయోగించుకునేందుకు వీలుగా నదీ తీరంలోని ఓ చెట్టు కింద బిట్టు సింగ్ రెండు పెద్ద చెత్తబుట్టలను ఏర్పాటు చేశాడు. నదిలో చెత్తను పారవేయకుండా, ఈ డస్ట్‌బిన్‌లలో వేస్తారనే సదుద్దేశంతో ఈ ఏర్పాట్లు చేశాడు. అయితే కొన్ని రోజుల తర్వాత అక్కడికి వెళ్లి చూసేసరికి ఆ రెండు చెత్తబుట్టలలో ఒకటి కనిపించకుండా పోయింది. సమాజ శ్రేయస్సును కాంక్షించి తాను చేసిన నిస్వార్థ ప్రయత్నానికి ఇలాంటి పరిస్థితి ఎదురుకావడంతో అతడు తీవ్ర ఆవేదనకు లోనయ్యాడు. దీనిపై ఒక వీడియో తీసి సోషల్ మీడియాలో పోస్ట్ చేయగా, అది ప్రస్తుతం నెటిజన్ల దృష్టిని ఆకర్షిస్తోంది.

బిట్టు సింగ్ పెట్టిన పోస్టును చూసిన నెటిజన్లు పర్యావరణ పరిరక్షణకు నడుం బిగించే ఇలాంటి యువతకు అండగా నిలవాలని అభిప్రాయపడుతున్నారు. నదిలో చెత్త వేసేవారికి భారీ జరిమానాలు విధించాలని, నదీ తీర ప్రాంతాల్లో భద్రతా ఏర్పాట్లను కట్టుదిట్టం చేయాలని పలువురు సూచిస్తున్నారు. ఇప్పటికే ఒంటరిగా నదిని బాగుచేసి అందరి మన్ననలు పొందిన బిట్టు సింగ్, ప్రజల కోసం సొంతంగా ఏర్పాటు చేసిన డస్ట్‌బిన్నే దొంగతనానికి గురవడంతో తీవ్ర నిరాశ చెందాడు. నదులను, పర్యావరణాన్ని కాపాడటం కేవలం ఒక్కరి బాధ్యత మాత్రమే కాదని, ప్రజలందరూ కలిసికట్టుగా నిర్వహించాల్సిన కర్తవ్యమని ఈ సంఘటన మరోసారి గుర్తుచేస్తోంది.