తండ్రిని మించిన తనయుడు! 8 భారీ సిక్సర్లు.. బౌండరీల రూపంలోనే 124 పరుగులు.. ఊచకోత కోసిన సెహ్వాగ్ కుమారుడు.. కళ్లు చెదిరే ఇన్నింగ్స్!

భారత మాజీ డాషింగ్ ఓపెనర్ వీరేంద్ర సెహ్వాగ్ బాటలోనే పయనిస్తూ, ఆయన కుమారుడు, ఢిల్లీ అండర్-19 జట్టు కెప్టెన్ ఆర్యవీర్ సెహ్వాగ్ దేశవాళీ క్రికెట్‌లో తన విధ్వంసకర బ్యాటింగ్‌తో అందరి దృష్టినీ ఆకర్షించాడు.

అక్టోబర్ 16న జరిగిన వినూ మన్కడ్ ట్రోఫీ మ్యాచ్‌లో చండీగఢ్ U-19 జట్టుపై ఆర్యవీర్ ఈ అద్భుతమైన ఇన్నింగ్స్ ఆడాడు.

ఈ మ్యాచ్‌లో ఓపెనర్‌గా బరిలోకి దిగిన 18 ఏళ్ల ఆర్యవీర్ సెహ్వాగ్ ప్రత్యర్థి బౌలర్లపై విరుచుకుపడ్డాడు. కేవలం 143 బంతుల్లో 19 ఫోర్లు, 8 భారీ సిక్సర్ల సాయంతో ఏకంగా 173 పరుగులు సాధించి అదరగొట్టాడు. జట్టు భారీ స్కోరు చేయడంలో కీలక పాత్ర పోషించిన అతడు, డబుల్ సెంచరీకి చేరువవుతున్న తరుణంలో 46వ ఓవర్లో ఔటయ్యాడు. కేవలం బౌండరీల (ఫోర్లు, సిక్సర్లు) రూపంలోనే ఏకంగా 124 పరుగులు రాబట్టడం విశేషం.

ఒంటిచేత్తో పోరాడిన ఆర్యవీర్ ఢిల్లీ జట్టు స్కోరును 289 పరుగులకు చేర్చినప్పటికీ, మిగతా బ్యాటర్ల నుంచి అతడికి సరైన సహకారం అందలేదు. మరో ఓపెనర్ ఆర్నవ్ బుగ్గా 47 పరుగులు చేశాడు. అనంతరం భారీ లక్ష్యంతో బరిలోకి దిగిన చండీగఢ్ U-19 జట్టు, కేవలం 41.5 ఓవర్లలోనే 5 వికెట్లు కోల్పోయి లక్ష్యాన్ని ఛేదించి, 5 వికెట్ల తేడాతో విజయం సాధించింది.

అక్టోబర్ 18న తన 19వ పుట్టినరోజు జరుపుకోనున్న ఆర్యవీర్, ఇటీవలే ఆస్ట్రేలియా U-19 జట్టుతో జరిగిన వన్డే సిరీస్‌లోనూ భారత జట్టుకు ప్రాతినిధ్యం వహించడం గమనార్హం. తండ్రి సెహ్వాగ్ ఇచ్చిన సూచనల ప్రకారం ఎటువంటి భయం లేకుండా సహజ సిద్ధమైన దూకుడుతో బ్యాటింగ్ చేస్తున్న ఆర్యవీర్ ఆటతీరు, ప్రస్తుతం భారత క్రికెట్ వర్గాల్లో తీవ్ర చర్చనీయాంశంగా మారింది.