“నా పెళ్లికి మీరు తప్పకుండా రావాలి యోగీజీ..!” కన్నీళ్లే బలహీనత అనుకున్నా.. మీ వీడియోనే నన్ను మార్చింది.. కాబోయే పెళ్లికూతురి భావోద్వేగ లేఖ వైరల్..!!

కేరళకు చెందిన అరుంధతి అనే యువతి, ఉత్తరప్రదేశ్ ముఖ్యమంత్రి యోగి ఆదిత్యనాథ్‌ను తన పెళ్లికి ఆహ్వానిస్తూ లేదా ఆశీస్సులు అందించాలని కోరుతూ రెండు పేజీల భావోద్వేగ పూరిత లేఖ రాశారు.

చిన్నతనంలో తాను చిన్న విషయానికే కన్నీళ్లు పెట్టుకునే స్వభావం ఉండటంతో, తనను తాను బలహీనురాలిగా భావించేదాన్నని ఆమె పేర్కొన్నారు. ఆ సమయంలో యోగి ఆదిత్యనాథ్ భావోద్వేగానికి గురైన ఒక వీడియోను ఆమె సోదరుడు చూపించి, భావోద్వేగాలు ఉండటం బలహీనత ఏమీ కాదని ఆమెకు అర్థమయ్యేలా చెప్పారు.

ఆ వీడియో ద్వారా ఎంతో ప్రేరణ పొందిన అరుంధతి, గడ్డు పరిస్థితులు ఎదురైనా వెనకడుగు వేయకుండా నిరంతరం పోరాడుతూ ఎలా ముందుకు సాగాలో యోగి ఆదిత్యనాథ్ నుంచి నేర్చుకున్నానని తన లేఖలో గుర్తుచేసుకున్నారు.

తన జీవితంలో ఒక మార్గదర్శిగా, పెద్దన్నగా భావించే యోగి ఆదిత్యనాథ్‌పై ఉన్న అపారమైన గౌరవంతో.. వచ్చే డిసెంబర్ 20న కేరళలోని ఆలూవాలో జరగనున్న తన వివాహ వేడుకకు ఆయన స్వయంగా విచ్చేసి ఆశీర్వదించాలని ఎంతో ఆప్యాయంగా ఆహ్వానించారు.

ఒకవేళ ముఖ్యమంత్రి స్వయంగా రాలేకపోయినా, ఆయన అందించే మనస్ఫూర్తి ఆశీస్సులు, శుభాకాంక్షలే తనకు అతిపెద్ద బహుమతిగా భావిస్తానని అరుంధతి ఆ లేఖలో ఎంతో హృద్యంగా రాసుకొచ్చారు.