దాండియా ఆడుతున్న లేడీ డాక్టర్.. అర్ధరాత్రి 1 గంటకు వచ్చిన ఎమర్జెన్సీ కాల్! మరుక్షణమే డ్యాన్స్ ఆపేసి ఆసుపత్రికి పరుగులు.. అదీ అదే దుస్తుల్లో.!!!

నవరాత్రి ఉత్సవాల సందర్భంగా గుజరాత్ రాష్ట్రవ్యాప్తంగా గర్బా, దాండియా నృత్య వేడుకలు అత్యంత ఉత్సాహంగా సాగుతున్నాయి.

ఈ క్రమంలో సూరత్ నగరానికి చెందిన ఓ మహిళా వైద్యురాలు గర్బా నృత్యంలో మునిగి తేలుతుండగా.. అర్ధరాత్రి వచ్చిన అత్యవసర ఫోన్ కాల్‌ను స్వీకరించి, వెంటనే ఆసుపత్రికి పరుగుతీసిన ఘటన సోషల్ మీడియాలో విశేష దృష్టిని ఆకర్షిస్తోంది. తన వ్యక్తిగత సంతోషం కంటే రోగి ప్రాణానికే అత్యున్నత ప్రాధాన్యతనిచ్చిన ఆమె నిబద్ధతపై సర్వత్రా ప్రశంసలు వెల్లువెత్తుతున్నాయి.

సూరత్‌లోని మెహతా ఆసుపత్రి హై-రిస్క్ ప్రెగ్నెన్సీ కేర్ సెంటర్‌లో సేవలందిస్తున్న డాక్టర్ కల్పనా సవానీ, నవరాత్రి మొదటి రోజున గర్బా నృత్యోత్సవంలో పాల్గొన్నారు. ఆ సమయంలో అర్ధరాత్రి 12:30 నుండి 1:00 గంటల మధ్య ఆసుపత్రి నుంచి ఆమెకు వరుసగా ఫోన్ కాల్స్ వచ్చాయి. బార్డోలి ప్రాంతానికి చెందిన ఓ గర్భిణి అత్యంత విషమ పరిస్థితుల్లో ఐసీయూ (ICU)లో చేరినట్లు సిబ్బంది ఆమెకు సమాచారం అందించారు.

రోగి పరిస్థితి తీవ్రతను గ్రహించిన డాక్టర్ కల్పనా.. క్షణం కూడా ఆలస్యం చేయకుండా వెంటనే ర్యాపిడో (Rapido) బైక్ బుక్ చేసుకుని, తను గర్బా డ్యాన్స్ కోసం ధరించిన సంప్రదాయ దుస్తుల్లోనే నేరుగా ఆసుపత్రికి చేరుకున్నారు. అక్కడికి చేరుకోగానే రోగి పరిస్థితిని స్వయంగా పరీక్షించి, వెంటిలేటర్ సాయంతో తక్షణ అత్యవసర చికిత్స అందించేలా ఏర్పాట్లు చేశారు. సరైన సమయంలో అందించిన చికిత్సతో ఆ మహిళ పరిస్థితి కుదుటపడి, స్పృహలోకి వచ్చినట్లు వైద్యులు తెలిపారు.

చిన్నప్పటి నుంచే గర్బా నృత్యంపై అమితమైన ఆసక్తి ఉన్న డాక్టర్ కల్పనా.. ఎంబీబీఎస్, పీజీ మెడికల్ చదువులు, ప్రాక్టీస్, ఆసుపత్రి బాధ్యతల వల్ల దాదాపు 10 నుండి 12 ఏళ్ల పాటు ఆ నృత్య వేడుకలకు దూరంగా ఉన్నారు. స్వంతంగా ఆసుపత్రిని ప్రారంభించిన తర్వాత, గత రెండేళ్లుగా మళ్లీ ఆమె గర్బా వేడుకల్లో పాల్గొంటున్నారు. అయినప్పటికీ, పండుగ సంబరాల్లో మునిగి తేలుతున్న సమయంలోనూ అత్యవసర కాల్‌కు ప్రాధాన్యతనిచ్చి ప్రాణాలను కాపాడిన ఆమె అంకితభావం వైద్య వృత్తికే ఆదర్శంగా నిలుస్తోంది.