టిక్‌టాక్ (TikTok) యాప్‌లో పరిచయమైన తన ప్రియురాలిని నేరుగా కలిసి తన ప్రేమను వ్యక్తపరచాలని.. ఇంటి ఆస్తులను, సర్వస్వాన్నీ అమ్ముకుని సుమారు 1,200 మైళ్లు ప్రయాణించిన బ్రెజిల్ యువకుడికి అక్కడికి చేరుకున్న తర్వాతే అసలు నిజం తెలిసింది. తాను ప్రాణంగా ప్రేమించిన ఆ యువతి అసలైన మనిషే కాదని, అది ఆర్టిఫిషియల్ ఇంటెలిజెన్స్ (AI) సాంకేతికతతో సృష్టించిన ఒక నకిలీ ప్రొఫైల్ అని తెలిసి ఆ యువకుడు నిశ్చేష్టుడయ్యాడు.
ఆన్‌లైన్ ప్రపంచపు మోసపూరిత మాయలో చిక్కుకుని జీవితాన్నే నాశనం చేసుకున్న ఈ యువకుడి దయనీయ స్థితి నెటిజన్లను తీవ్ర దిగ్భ్రాంతికి, విచారానికి గురిచేసింది. గతంలో టిక్‌టాక్ సోషల్ మీడియాలో ఒక అందమైన యువతి ఖాతాను చూసి ఆకర్షితుడైన ఆ యువకుడు, రోజూ ఆమెతో మెసేజ్‌లు చేస్తూ ముచ్చటించేవాడు.
ఏఐ టెక్నాలజీ సాయంతో రూపొందించిన ఆ నకిలీ రూపం.. అచ్చం నిజమైన మనిషిలాగే మాట్లాడుతూ ఆ యువకుడి మనసులో గాఢమైన ప్రేమను నింపింది. ఎలాగైనా తన ప్రేయసిని నేరుగా కలిసి వివాహం చేసుకోవాలనే విపరీతమైన ఆరాటంతో, తన ఆస్తులు, వస్తువులన్నింటినీ అమ్మేసి డబ్బు చేసుకుని.. ఏకంగా 1,200 మైళ్ల దూరం ప్రయాణించి ఆమెను వెతుక్కుంటూ వెళ్లాడు.
అయితే, సదరు ప్రాంతానికి చేరుకుని ఆరా తీసిన తర్వాతే.. తాను ఇన్ని రోజులుగా మాట్లాడి మురిసిపోయింది అసలు మనిషే కాదని, కేవలం కంప్యూటర్ సృష్టించిన భ్రమ మాత్రమేనన్న చేదు నిజం అతడికి బోధపడింది. ప్రేమ పేరుతో తన జీవితాన్ని, జీవితకాల సంపాదనను పోగొట్టుకుని నడిరోడ్డున నిలబడిన ఈ యువకుడి ఉదంతం డిజిటల్ ప్రపంచంలో విహరించే వారికి ఒక పెద్ద హెచ్చరికగా నిలిచింది. ఆన్‌లైన్ పరిచయాలు, ప్రేమ మోజులో పడి అడ్డంగా మోసపోవద్దని నిపుణులు, సామాజిక కార్యకర్తలు సూచిస్తున్నారు.
Leave a Reply