చిన్నగా కింద పడినా ఎముకలు నుజ్జునుజ్జయ్యే ప్రమాదం!.. మహిళలారా అప్రమత్తంగా ఉండండి.. శరీరంలో నిశ్శబ్దంగా ఎముకలను బలహీనపరిచే ఈ వ్యాధి ఏంటి? ప్రారంభంలోనే గుర్తించడం ఎలా?

చిన్నగా తడబడి కింద పడినా ఎముక విరిగిపోయే ప్రమాదం ఉందా? ముఖ్యంగా మహిళలు వయసు పెరుగుతున్న కొద్దీ జాగ్రత్తపడాల్సిన అత్యంత కీలకమైన ఆరోగ్య సమస్యలలో ‘ఆస్టియోపోరోసిస్’ (Osteoporosis) ఒకటి.

నిశ్శబ్దంగా దాడి చేసే వ్యాధి:
ఈ వ్యాధి వస్తే ఎముకలు క్రమక్రమంగా తమ బలాన్ని కోల్పోయి, సులభంగా విరిగిపోయే స్థితికి చేరుకుంటాయి. ఇందులో అత్యంత భయకరమైన విషయం ఏమిటంటే, ప్రాథమిక దశలో ఎలాంటి నొప్పులు వంటి స్పష్టమైన లక్షణాలు లేకుండానే ఎముకలు లోపల నుంచి బలహీనపడతాయి. వెన్నుముక వంగడం, ఎత్తు తగ్గడం వంటి మార్పులను చాలామంది వృద్ధాప్యంలో సహజమైన లక్షణాలుగా భావించి నిర్లక్ష్యం చేస్తుంటారు. దీనివల్ల, చిన్న ప్రమాదం జరిగి లేదా కింద పడి ఎముక విరిగిన తర్వాతే కొందరికి ఈ వ్యాధి ఉన్నట్లు తెలుస్తుంది. ముఖ్యంగా, మెనోపాజ్ (Menopause) దశకు చేరుకుంటున్న మహిళల్లో ఎముకల బలం తగ్గే ప్రమాదం మరింత ఎక్కువగా ఉంటుంది.

నివారణ మరియు సంరక్షణ చర్యలు:
కేవలం కాల్షియం మాత్రలు వేసుకుంటే ఈ వ్యాధిని పూర్తిగా నివారించవచ్చా? లేదు. ఎముకల ఆరోగ్యానికి కాల్షియంతో పాటు విటమిన్ డి, తగినంత ప్రొటీన్ మరియు తగిన వ్యాయామాలు కూడా చాలా ముఖ్యం. వేగంగా నడవడం, మెట్లు ఎక్కడం, కండరాలను బలపరిచే వ్యాయామాలు ఎంతో సహాయపడతాయి. అలాగే ధూమపానం మానివేయడం, మద్యం అలవాటు ఉంటే వాటిని నియంత్రించడం ఎముకల ఆరోగ్యానికి చాలా ముఖ్యం.

పరీక్ష ఎప్పుడు అవసరం?
ఎవరికి ఎముకల సాంద్రత పరీక్ష (Bone density test) అవసరమనేది వారి వయస్సు మరియు వ్యక్తిగత ఆరోగ్య సమస్యలపై ఆధారపడి ఉంటుంది. ముందస్తుగా మెనోపాజ్ రావడం, కుటుంబంలో ఎముకల సమస్యల చరిత్ర ఉండటం, శరీర బరువు చాలా తక్కువగా ఉండటం, విటమిన్ డి లోపం లేదా దీర్ఘకాలికంగా స్టెరాయిడ్ మందులు వాడటం వంటి కారణాలు ఉంటే వెంటనే డాక్టర్‌ను సంప్రదించాలి. ‘డెక్షా’ (DEXA) స్కాన్ ద్వారా ఎముకల సాంద్రతను కచ్చితంగా కొలవవచ్చు. ఎముకలు బలహీనపడటాన్ని వయసు సహజ మార్పుగా భావించి నిర్లక్ష్యం చేయకుండా, సరైన సమయంలో పరీక్షలు చేయించుకుని తగిన జాగ్రత్తలు తీసుకోవడమే ముఖ్యం.