కారునే ఎత్తుతోంది.. కత్తితో దాడి చేసేవాడిని కూడా ఎదుర్కొంటోంది..! నిజ జీవితంలో సూపర్‌హీరోగా మారిన రోబోట్.? చైనా వైరల్ వీడియోలో అసలు ఏముంది.!!

సినిమాల్లో మాత్రమే చూసిన రోబోట్ల యాక్షన్ విన్యాసాలు నిజమైపోయాయా అనే అనుమానాన్ని కలిగిస్తోంది చైనాకు చెందిన రోబోటిక్స్ సంస్థ విడుదల చేసిన ఒక కొత్త వీడియో.

కారును ఎత్తడం, ప్రమాదంలో చిక్కుకున్న వారిని కాపాడటం, ఆయుధంతో దాడి చేయడానికి వచ్చే వ్యక్తిని ఎదుర్కొవడం వంటి పలు సాహసోపేతమైన దృశ్యాలు ఉన్న ఈ వీడియో ప్రస్తుతం ఇంటర్నెట్‌లో విపరీతంగా ఆకట్టుకుంటోంది. ఈ రోబోట్‌కు ‘కుంగ్ ఫూ లెజెండ్: గార్డియన్’ అని పేరు పెట్టారు.

ఈ రోబోట్ కారులో చిక్కుకున్న వ్యక్తిని రక్షించడానికి దాని తలుపును పగలగొట్టడం, పూర్తి కారును పైకి ఎత్తడం వంటి దృశ్యాలు ఆ వీడియోలో ఉన్నాయి. మరో దృశ్యంలో, కత్తితో దాడి చేయడానికి వచ్చే వ్యక్తి నుండి ఒక మహిళను కాపాడేలా రోబోట్ పనిచేస్తుంది. రోడ్డుపై వెళ్తున్న వాహనం నుండి ఒక వ్యక్తిని లాగి కాపాడే దృశ్యం కూడా ఉంది. దీని వేగవంతమైన, సాహసోపేతమైన పనులు చూసేవారిని ఎంతగానో ఆశ్చర్యపరుస్తున్నాయి.

ఈ రోబోట్‌ను అభివృద్ధి చేసిన యూనిట్రీ రోబోటిక్స్ సంస్థ వెల్లడించిన వివరాల ప్రకారం, H2-X మోడల్ సుమారు 1.8 మీటర్ల ఎత్తు, 70 కిలోల బరువు ఉంటుంది. పూర్తిగా ఛార్జ్ చేస్తే దాదాపు 8 గంటల పాటు పనిచేసే సామర్థ్యం దీనికి ఉందని సంస్థ తెలిపింది. రక్షణ చర్యలు మరియు భద్రతా అవసరాలలో మనుషులకు సహాయపడే రోబోట్లను రూపొందించే ప్రయత్నాలలో భాగంగా ఈ మోడల్‌ను పరిచయం చేశారు.

అయితే, ఈ వీడియోలో చూపించిన అన్ని పనులను రోబోట్ స్వయంగా నిర్ణయం తీసుకుని చేస్తోందా లేదా ముందే ప్రణాళిక చేసిన (ప్రీ-ప్రోగ్రామ్డ్) విధానాల ఆధారంగా చేస్తోందా అనే దానిపై స్పష్టమైన వివరణ రాలేదు. అందువల్ల, వీడియోలో కనిపించే దృశ్యాలను మాత్రమే చూసి దాని అసలైన పనితీరును పూర్తిగా అంచనా వేయలేము. అంతేకాకుండా, ఈ శక్తివంతమైన రోబోట్‌ను ఉపయోగించేటప్పుడు భద్రతా నియమాలను పాటించాలని, దీనికి 2 నుండి 3 మీటర్ల దూరంలో ఉండాలని కూడా హెచ్చరిక జారీ చేయబడింది.