వ్యవసాయంలో సరైన ప్రణాళిక, ఆధునిక పద్ధతులు ఉంటే కోట్ల రూపాయల ఆదాయం సంపాదించవచ్చని ఆంధ్రప్రదేశ్‌కు చెందిన రైతు కిష్టా రెడ్డి నిరూపిస్తూ ఒక ఆదర్శంగా నిలుస్తున్నారు.
అనంతపురం జిల్లా, రాప్తాడు మండలం, రామినేపల్లి గ్రామానికి చెందిన ఈయన, తన 15 ఎకరాల దానిమ్మ తోట ద్వారా ఏడాదికి రూ.1 కోటికి పైగా ఆదాయం ఆర్జిస్తున్నారు. నీటి కొరత, బీడు భూములకు పేరుగాంచిన ప్రాంతంలో ఆయన సాధించిన ఈ విజయం ఇతర రైతుల దృష్టిని ఆకర్షించింది.
కిష్టా రెడ్డి విజయానికి క్రమబద్ధమైన నిర్వహణ, ప్రణాళికాబద్ధమైన సాగు ముఖ్య కారణాలు. మొక్కలకు అవసరమైన సమయంలో నీరు అందించడం, సేంద్రీయ ఎరువులను వాడటం, రసాయన ఎరువుల వినియోగాన్ని తగ్గించడం వంటి పద్ధతులను ఆయన పాటిస్తున్నారు. కోత పూర్తయిన తర్వాత అనవసరమైన కొమ్మలను తొలగించి, తోటను మళ్లీ సాగుకు సిద్ధం చేస్తున్నారు. దీని ద్వారా నేల సారాన్ని కాపాడుతూ, తదుపరి పంట కోసం మొక్కల ఎదుగుదలపై శ్రద్ధ వహిస్తున్నారు.
వాతావరణ మార్పుల వల్ల ఎదురయ్యే సవాళ్లను అధిగమించేందుకు తన 15 ఎకరాల తోటలో రక్షణ వలలను (షేడ్ నెట్స్) ఏర్పాటు చేశారు. తీవ్రమైన ఎండ, మంచు, చీడపీడల నుంచి మొక్కలకు జరిగే నష్టాన్ని తగ్గించడంతో పాటు, పండ్ల నాణ్యతను పెంచడానికి ఈ ఏర్పాటు ఎంతగానో సహాయపడుతుంది. దీని ఫలితంగా ఏడాదికి సుమారు 100 నుంచి 130 టన్నుల వరకు దానిమ్మ దిగుబడి వస్తున్నట్లు సమాచారం. ఎర్రటి రంగు, మంచి నాణ్యతతో ఉండే ఈ పండ్లకు మార్కెట్‌లో మంచి ఆదరణ ఉందని తెలుస్తోంది.
వ్యాపారులు నేరుగా ఆయన తోటకే వచ్చి దానిమ్మ పండ్లను కొనుగోలు చేస్తుండటంతో దళారుల బెడద తప్పింది. దీని వల్ల విక్రయాలు సులభంగా సాగుతున్నాయి. కేవలం దానిమ్మ సాగుతోనే ఆగిపోకుండా మరో 8 ఎకరాల్లో ద్రాక్ష కూడా సాగు చేస్తున్నారు. సరైన తోట నిర్వహణ, ఆధునిక వ్యవసాయ పద్ధతులు, నాణ్యమైన దిగుబడి, మార్కెట్ అవకాశాలను సరిగ్గా ఉపయోగించుకోవడం ద్వారా వ్యవసాయంలోనూ భారీ ఆదాయం గడించవచ్చని కిష్టా రెడ్డి విజయ యాత్ర నిరూపిస్తోంది.
Leave a Reply