“అన్నా నన్ను కాపాడండి.. నా సొంత సోదరే నన్ను ఇరికించింది. కారులో కిడ్నాప్ చేసి చంపబోతున్నారు.” వాట్సాప్‌లో వాయిస్ మెసేజ్. పొదల్లో దారుణ స్థితిలో 25 ఏళ్ల యువతి మృతదేహం.. కలకలం..!

లక్నోలోని ఔటర్ రింగ్ రోడ్డు సర్వీస్ రోడ్డు పక్కన ఉన్న పొదల్లో 25 ఏళ్ల యువతి దారుణ హత్యకు గురై శవంగా లభ్యమైన ఘటన ఆ ప్రాంతంలో తీవ్ర కలకలాన్ని రేపింది.

మృతురాలిని ఉన్నావ్ జిల్లాకు చెందిన ఆసియా అలియాస్ నర్గీస్ (25)గా గుర్తించారు. ఆమెను మరెక్కడో హత్య చేసి, ఆధారాలను చెరిపేసే ఉద్దేశంతోనే హంతకులు మృతదేహాన్ని తీసుకొచ్చి ఇక్కడ పొదల్లో పడేసినట్లు విచారణలో తేలింది.

తన ప్రాణాలకు ముప్పు వాటిల్లడానికి కొన్ని నిమిషాల ముందు, ఆసియా తన సోదరుడు, సోదరికి వాట్సాప్‌లో పంపిన ఆపద సందేశం (వాయిస్ మెసేజ్) ఈ కేసులో కీలక మలుపు తిప్పింది. “తెల్లటి స్విఫ్ట్ కారులో వచ్చిన కొందరు నన్ను కిడ్నాప్ చేశారు. నా సొంత సోదరి షాహీన్ నన్ను వీరికి అప్పగించి ఇరికించింది. నా దగ్గర డబ్బులు లాక్కున్న అర్స్లాన్, కల్లు, ముదబ్బీర్ అనే వ్యక్తులే నన్ను శత్రువుల చేతికి అప్పగించారు. వీరి పేర్లను ఓ చీటీలో రాసి నా బ్యాగ్‌లో పెట్టాను; దయచేసి నన్ను కాపాడండి” అని ఆ ఆందోళనకరమైన మెసేజ్‌లో ఆమె పేర్కొంది.

ఆదివారం వెలువడిన పోస్టుమార్టం నివేదికలో.. హంతకులు ముందుగా ఆసియా తలపై బలమైన ఆయుధంతో దాడి చేసి, ఆ తర్వాత గొంతు నులిమి దారుణంగా హత్య చేసినట్లు నిర్ధారణ అయింది. మృతదేహం వద్ద లభించిన పత్రాలు, వాట్సాప్ మెసేజ్ ఆధారాల మేరకు ఆసియా అక్క నస్రీన్ ఇచ్చిన ఫిర్యాదుతో పోలీసులు కేసు నమోదు చేశారు.

ఆసియా కుటుంబంలో ఉన్న అంతర్గత సమస్యలు, వాట్సాప్ మెసేజ్‌లో ఆమె పేర్కొన్న వ్యక్తుల నేపథ్యంపై పోలీసులు ముమ్మరంగా దర్యాప్తు చేస్తున్నారు. సెల్‌ఫోన్ లొకేషన్ ఆధారంగా అనుమానితులను అదుపులోకి తీసుకుని విచారిస్తున్నామని, త్వరలోనే హంతకులను అరెస్టు చేసి ఈ మిస్టరీ హత్య వెనుక ఉన్న అసలు వాస్తవాలను వెలుగులోకి తెస్తామని పోలీసులు తెలిపారు.