ఒక క్యాబ్ ప్రయాణం యువతికి భయానక అనుభవంగా మారింది. యాప్‌లో చూపించిన ఛార్జీ రూ.625 కాగా, డ్రైవర్ మాత్రం రూ.1,479 చెల్లించాలని డిమాండ్ చేశాడని ఆరోపణలు వచ్చాయి. అదనపు డబ్బులు ఇచ్చేందుకు నిరాకరించడంతో కారులోనే బంధించి, బెదిరింపులకు పాల్పడ్డాడని బాధిత యువతి వెల్లడించినట్లు తమిళ కథనం పేర్కొంది.
అదనపు ఛార్జీ చెల్లించలేదని బెదిరింపులు!
తమిళ కథనం ప్రకారం.. ఢిల్లీ విమానాశ్రయం నుంచి గురుగ్రామ్‌కు తెల్లవారుజామున ఉబర్ క్యాబ్‌లో ప్రయాణించిన యువతికి ఈ ఘటన ఎదురైంది. యాప్‌లో చూపించిన రూ.625 ఛార్జీని చెల్లించినప్పటికీ, డ్రైవర్ మరో యాప్‌కు సంబంధించిన స్క్రీన్‌షాట్ చూపిస్తూ రూ.1,479 ఇవ్వాలని పట్టుబట్టినట్లు సమాచారం.
అదనపు డబ్బులు చెల్లించేందుకు యువతి నిరాకరించడంతో డ్రైవర్ కారు డోర్లు లాక్ చేసి, ఆమెను బయటకు వెళ్లనివ్వలేదని ఆరోపణలు ఉన్నాయి. తన వస్తువులను తీసుకునే ప్రయత్నంలో ఆమెను బలవంతంగా అడ్డుకుని, కిటికీని సైతం మూసివేసినట్లు కథనంలో పేర్కొన్నారు.
ఇంటి వరకు వెంబడించి మరీ వేధింపులు?
కారు నుంచి బయటపడిన తర్వాత యువతి ఇంటికి వెళ్లేందుకు ప్రయత్నించగా, డ్రైవర్ ఆమెను వెంబడిస్తూ అసభ్యంగా మాట్లాడి బెదిరించినట్లు ఆరోపణలు వచ్చాయి. ఇంటి గేటు ఎక్కి లోపలికి రావడానికి ప్రయత్నించినట్లు కూడా ఆమె తన ఎక్స్‌ పోస్టులో వెల్లడించినట్లు తమిళ కథనం తెలిపింది.
స్పందించిన ఉబర్.. పోలీసుల దర్యాప్తు?
ఈ ఘటనపై సోషల్ మీడియాలో చర్చ మొదలైన తర్వాత, సంబంధిత డ్రైవర్ ఖాతాను ఉబర్ తొలగించినట్లు కథనంలో పేర్కొన్నారు. పోలీసుల విచారణకు సహకరిస్తామని సంస్థ తెలిపినట్లు సమాచారం. బాధితురాలి ఫిర్యాదుపై పోలీసులు విచారణ చేపట్టినట్లు కూడా ఆ కథనం వెల్లడించింది.
Leave a Reply