“ప్రభుత్వ కార్యాలయంలో డ్యాన్స్ చేసిన మహిళా ఉద్యోగి..! ఆకుపచ్చ చీరలో ఆఫీస్‌లో అదిరిపోయే డ్యాన్స్. పని చేస్తున్నారా లేదా ఆడిపాడుతున్నారా..? లీకైన వీడియో..!

న్యూఢిల్లీలో ప్రభుత్వ కార్యాలయాన్ని పోలి ఉన్న గదిలో, ఆకుపచ్చ రంగు చీర కట్టుకున్న ఓ మహిళ బాలీవుడ్ పాటకు డ్యాన్స్ చేస్తున్న వీడియో సోషల్ మీడియాలో వేగంగా వైరల్ అవుతోంది.

ఆ గదిలో కంప్యూటర్లు, ఫైళ్లు, కుర్చీలు, బల్లలు ఉన్నట్లుగా కనిపించడంతో పాటు, కొందరు వ్యక్తులు కుర్చీల్లో కూర్చున్నట్లు కూడా ఆ వీడియోలో రికార్డ్ అయింది. ఈ ఘటన ప్రభుత్వ కార్యాలయాల్లో క్రమశిక్షణ, ఆఫీసు సంస్కృతి, అక్కడి పని వాతావరణంపై తీవ్ర చర్చలకు దారితీసింది.

ఈ వీడియో ఎప్పుడు, ఎక్కడ, ఏ పరిస్థితుల్లో తీశారనే దానిపై ఇప్పటివరకు ఎలాంటి అధికారిక నిర్ధారణ వెలువడలేదు. ఇది ఆఫీస్ పనివేళల్లో జరిగిందా? లేక ఏదైనా ఉద్యోగుల వేడుక లేదా వీడ్కోలు (ఫేర్‌వెల్) కార్యక్రమంలో తీశారా? అనేది అస్పష్టంగానే ఉంది. అయినప్పటికీ, ప్రజలకు సేవలు అందించే ప్రభుత్వ కార్యాలయాల్లో ఇలాంటి చర్యలు సరైనవేనా అని నెటిజన్లు ప్రశ్నిస్తున్నారు.

సోషల్ మీడియాలో వైరల్ అవుతున్న ఈ వీడియోపై నెటిజన్ల మధ్య భిన్నాభిప్రాయాలు వ్యక్తమవుతున్నాయి. ప్రభుత్వ కార్యాలయాలు ప్రజల అవసరాల కోసం ఉన్నాయని, అక్కడ క్రమశిక్షణ, సాంప్రదాయాలను కచ్చితంగా పాటించాలని కొందరు నెటిజన్లు వాదిస్తున్నారు.

అదే సమయంలో, కేవలం కొన్ని సెకన్ల పాటు ఉండే వైరల్ వీడియోను మాత్రమే చూసి, పూర్తి నిజం తెలుసుకోకుండా సంబంధిత ఉద్యోగులను తప్పుబట్టడం సరికాదని, అసలు వాస్తవమేమిటో తెలుసుకునేందుకు సంబంధిత శాఖాపరమైన విచారణ జరగాలని మరికొందరు అభిప్రాయపడుతున్నారు.