“AI ని నమ్మి యుద్ధ నేరానికి పాల్పడిందా అమెరికా?”.. 120 మంది పిల్లలు బలియైన ఘోరం.. తొందరపాటులో తీసుకున్న తప్పుడు నిర్ణయాలు.. వైరలవుతున్న దిగ్భ్రాంతికర నివేదిక.!!

గత ఫిబ్రవరి చివరిలో ఇరాన్‌లోని మీనాబ్ నగరంలో ఉన్న ఒక ప్రాథమిక పాఠశాలపై జరిగిన తీవ్ర వైమానిక దాడిలో దాదాపు 120 మంది పిల్లలు దారుణంగా ప్రాణాలు కోల్పోయిన ఘటన ప్రపంచవ్యాప్తంగా తీవ్ర దిగ్భ్రాంతిని కలిగించింది.

అమెరికా, ఇజ్రాయెల్ కూటమి సంయుక్తంగా నిర్వహించిన ఈ సైనిక చర్యలో, లక్ష్యాలను ఎంచుకోవడంలో (టార్గెటింగ్) జరిగిన తీవ్రమైన లోపాలే ఈ ఘోర ప్రమాదానికి కారణమని పెంటగాన్ అంతర్గత విచారణలో వెల్లడైనట్లు సమాచారం. ముఖ్యంగా, యుద్ధం ప్రారంభ దశలో తక్కువ సమయంలో వెయ్యికి పైగా లక్ష్యాలపై దాడులు జరపడం వల్ల, వాటిని సరిగ్గా నిరూపించుకోవడానికి సైనికులకు తగిన సమయం లభించలేదని ఆ నివేదికలు స్పష్టం చేస్తున్నాయి.

సిబ్బంది కొరత, పాతబడిపోయిన శాటిలైట్ డేటా, కృత్రిమ మేధ (AI) పరికరాలపై అమితంగా ఆధారపడటమే ఈ తీవ్ర విషాదానికి ప్రధాన కారణాలుగా మారాయి. ఏళ్ల క్రితం సైనిక స్థావరంగా ఉపయోగపడిన ఆ ప్రాంతం, చాలా కాలంగా పాఠశాలగా నడుస్తున్న విషయాన్ని పాత డేటాతో సరిచూసుకోవడంలో అధికారులు విఫలమయ్యారు.

పలాంటిర్ సంస్థకు చెందిన ‘మేవెన్ స్మార్ట్ సిస్టమ్’ వంటి ఆధునిక AI పరికరాలను నమ్మి హడావుడిగా సిద్ధం చేసిన లక్ష్యాల జాబితాల వల్ల, మానవ ప్రత్యక్ష పరిశీలన కొరవడి నిరపరాధులైన పసిపిల్లల ప్రాణాలు బలిగొనే పరిస్థితి ఏర్పడింది.

మీనాబ్ పాఠశాలపై జరిగిన ఈ దాడి అంతర్జాతీయ మానవ హక్కుల చట్టాల ప్రకారం తీవ్రమైన ‘యుద్ధ నేరం’ (War Crime) అని ఐక్యరాజ్యసమితి మద్దతు ఉన్న నిజనిర్ధారణ కమిటీ బహిరంగంగా ఆరోపించింది. అమెరికా ప్రారంభంలో ఈ నిందను ఇరాన్ దళాలపైకి నెట్టడానికి ప్రయత్నించినప్పటికీ, సంఘటనా స్థలంలో లభ్యమైన ఆయుధ శకలాలు అవి అమెరికాకు చెందిన టోమాహాక్ క్షిపణులని ధృవీకరించాయి. ఈ అంశం ప్రస్తుతం ప్రపంచవ్యాప్తంగా పెద్ద చర్చనీయాంశంగా మారగా, భవిష్యత్తులో ఇటువంటి సాంకేతిక లోపాలను నివారించడానికి కొత్త భద్రతా పరీక్షలు అవసరమని నిపుణులు స్పష్టం చేస్తున్నారు.