నేటి డిజిటల్ యుగంలో ఇంటర్నెట్ వేగం ప్రాణవాయువు అంత ముఖ్యమైపోయింది. అయితే, సోషల్ మీడియాలో వైరల్ అవుతున్న కొన్ని ‘టెక్ హ్యాక్స్’ (Tech Hacks) సామాన్య వినియోగదారులను పూర్తిగా తప్పుదోవ పట్టిస్తున్నాయి. మీ వైఫై రూటర్ మీద నాణేలు (Coins) ఉంచితే ఇంటర్నెట్ వేగం పెరుగుతుందనే వార్త సోషల్ మీడియాలో హల్చల్ చేస్తోంది.
లక్షలాది మంది ఈ ‘టెక్ హ్యాక్’ నిజమని నమ్మి తమ రూటర్ల మీద నాణేల రాశులు పోస్తున్నారు. అయితే, టెక్ నిపుణులు దీనిపై ఒక షాకింగ్ సత్యాన్ని వెల్లడించారు. రూటర్ మీద లోహపు నాణేలను ఉంచడం వల్ల ఇంటర్నెట్ స్పీడ్ పెరగకపోగా, ఉన్న సిగ్నల్ కూడా బలహీనపడి ఇంటర్నెట్ కనెక్షన్ కట్ అయ్యే అవకాశం ఉంది. అంతేకాకుండా, ఇది రూటర్ అతిగా వేడెక్కేలా (Overheating) చేసి అగ్ని ప్రమాదాలకు కూడా దారితీయవచ్చని నిపుణులు హెచ్చరిస్తున్నారు.
ముఖ్యంగా వైఫై రూటర్లపై నాణేలను ఉంచితే సిగ్నల్ పెరుగుతుందని, రూటర్ నుండి వచ్చే వేడిని అవి పీల్చుకుంటాయని ప్రచారం జోరుగా సాగుతోంది. అయితే, ఈ చిన్న తప్పు మీ ఇంటర్నెట్ వేగాన్ని తగ్గించడమే కాకుండా, మీ ఇంటిని కూడా ప్రమాదంలోకి నెట్టే అవకాశం ఉందని నిపుణులు హెచ్చరించారు.
వాస్తవం ఏమిటి?
నిజం చెప్పాలంటే వైఫై రూటర్లు రేడియో తరంగాల (Radio Waves) ద్వారా పనిచేస్తాయి. రూటర్ మీద లోహపు నాణేలను ఉంచడం వల్ల యాంటెన్నా నుండి వచ్చే సిగ్నల్స్ మెరుగుపడవు, పైగా ఉన్న సిగ్నల్ కూడా అస్థిరతకు (Distortion) గురవుతుంది. లోహం సిగ్నల్లను అడ్డుకుంటుంది లేదా దిశ మారుస్తుంది. దీనివల్ల ఇంటర్నెట్ వేగం పెరగడానికి బదులుగా, కనెక్షన్ కట్ అవ్వడం లేదా రేంజ్ తగ్గిపోవడం వంటి సమస్యలు ఎదురవుతాయి. సాంకేతికంగా ఇది ఎలాంటి అదనపు ప్రయోజనాన్ని ఇవ్వదు, పైగా రూటర్ పనితీరును దెబ్బతీస్తుంది.
ప్రమాద సూచన:
మరోవైపు, నాణేలు వేడిని పీల్చుకుంటాయి (Heat absorption) అని భావించడం కూడా పెద్ద తప్పు. రూటర్ నుండి వచ్చే వేడిని నాణేలు బయటకు పంపవు. బదులుగా రూటర్ వెలుపలి వేడి ఒకే చోట పేరుకుపోయేలా (Trap heat) చేస్తాయి. దీనివల్ల లోపల ఉండే సర్క్యూట్ బోర్డ్ ఓవర్ హీట్ అయి, కాలక్రమేణా రూటర్ పాడైపోయే అవకాశం ఉంది. అత్యంత ప్రమాదకరమైన విషయం ఏమిటంటే, ఇలా ఉష్ణోగ్రత పెరగడం వల్ల కొన్ని సందర్భాల్లో అగ్ని ప్రమాదాలు (Fire hazard) సంభవించే అవకాశం కూడా ఉంది.
కేవలం వ్యూస్ కోసం చేసే ఇటువంటి వీడియోలను చూసి గుడ్డిగా అనుసరించడం వల్ల ఖరీదైన ఎలక్ట్రానిక్ వస్తువులు పాడైపోతున్నాయి. సాంకేతిక విషయాల పట్ల సరైన అవగాహన ఉండటం చాలా ముఖ్యం. ఏవైనా సాంకేతిక సమస్యలు ఉంటే రూటర్ స్థానాన్ని మార్చడం లేదా రీసెట్ చేయడం వంటి అధికారిక పద్ధతులను అనుసరించడం ఉత్తమం. మీ వైఫై సిగ్నల్ పెంచుకోవడానికి రూటర్లను ఇంటి మధ్యలో, ఎత్తైన ప్రదేశంలో ఉంచడం మంచిది. కానీ ఇటువంటి నాణేల ప్రయోగాలు మాత్రం పొరపాటున కూడా చేయకండి.