“Fake vs Real: పనీర్ ప్రియులారా జాగ్రత్త! మీరు తినేది అసలు పనీరేనా..?” మార్కెట్‌లో చక్కర్లు కొడుతున్న.. ఆ ప్రమాదకరమైన నకిలీ పనీర్.. వెంటనే ఇలా చెక్ చేయండి..!!!

ఇటీవల మహారాష్ట్ర, గుజరాత్ వంటి రాష్ట్రాల్లో ‘అనలాగ్ పనీర్’ (Analog Paneer) అని పిలువబడే నకిలీ పనీర్‌పై నిషేధం విధించారు.

మనం రోజువారీ ఆహారంలో తీసుకునే పనీర్, చీజ్ మరియు వెన్న వంటివి నిజంగా ఆరోగ్యకరమైనవేనా అనే ఆందోళనను ఈ సంఘటన ప్రజలలో రేకెత్తించింది.

చూడటానికి అసలు పనీర్‌లాగే ఉండే ఈ అనలాగ్ పనీర్ పాల నుండి తయారు చేయబడదు. దానికి బదులుగా వంట నూనెలు (వజటబుల్ ఆయిల్స్), వనస్పతి, స్టార్చ్ మరియు రసాయనాలను కలిపి కృత్రిమంగా తయారు చేస్తారు. ఇందులో అసలు పనీర్‌లో ఉండే కాల్షియం, ప్రొటీన్ వంటి పోషకాలు ఉండవు. పైగా గుండెను, జీర్ణవ్యవస్థను దెబ్బతీసే చెడు కొవ్వులు (ట్రాన్స్ ఫ్యాట్స్) అధిక పరిమాణంలో ఉంటాయి.

మనం కొనుగోలు చేసే పనీర్ ప్యాకెట్‌ను తనిఖీ చేయడం ద్వారా నకిలీ పనీర్‌ను కొంతవరకు గుర్తించవచ్చు. ప్యాకెట్ వెనుక ఉండే పదార్ధాల (Ingredients) జాబితాలో పాలు, వినిగర్, సిట్రిక్ యాసిడ్ అని లేకుండా ‘Vegetable Fat’, ‘Vegetable Oil’ లేదా ‘Analogue’ అని పేర్కొని ఉంటే, అది అసలు పనీర్ కాదని తెలుసుకోవచ్చు.

ఇంట్లోనే కొన్ని సులువైన పరీక్షల ద్వారా కూడా దీనిని గుర్తించవచ్చు. పనీర్‌ను ఉడకబెట్టి దానిపై కొన్ని చుక్కల ఐయోడిన్ ద్రావణం (Iodine Solution) వేసినప్పుడు అది నీలి రంగులోకి మారితే అందులో స్టార్చ్ కలిపారని అర్థం. అలాగే నిప్పుపై కాల్చినప్పుడు ప్లాస్టిక్ లేదా కెమికల్ వాసన వచ్చినా, వినిగర్ వేసినప్పుడు ఎలాంటి మార్పు రాకపోయినా అది నకిలీ పనీర్ కావచ్చు.

అసలు పనీర్ తినడానికి చాలా మెత్తగా, లేత పాల రుచితో ఉంటుంది. అలా కాకుండా రబ్బరులా సాగుతూ, ఎక్కువ నూనె జిడ్డుగా ఉంటే అది అనలాగ్ పనీర్ అయ్యే అవకాశం ఉంది. కాబట్టి పనీర్ కొనేటప్పుడు జాగ్రత్తగా చూసి కొనడమే మన ఆరోగ్యానికి మంచిది.