బెంగళూరు: ఈమె పేరు మీనాక్షి. స్వస్థలం గంగావతి. చూడటానికి చాలా పద్ధతిగా కనిపించే ఈమె చేసిన మోసం మాత్రం సామాన్యమైనది కాదు. ప్రముఖ ఇన్వెస్ట్మెంట్ యాప్ ‘Groww’తో తనకు సంబంధాలు ఉన్నాయని అబద్ధం చెప్పి వందలాది మంది మహిళలను నమ్మించింది.
తాను ఇన్వెస్ట్మెంట్ ఎక్స్పర్ట్ (పెట్టుబడుల నిపుణురాలు) అని ఫోజులిచ్చే ఈ కిలాడీ, పదింతల లాభం వస్తుందనే ఆశ చూపి డబ్బులు వసూలు చేయడం మొదలుపెట్టింది. విశేషమేమిటంటే, ఈమె కేవలం మహిళలనే టార్గెట్ చేసి వల విసిరేదని ఇప్పుడు వెలుగులోకి వచ్చింది.
సినిమా స్టైల్లో స్కెచ్
జనాన్ని నమ్మించడానికి ఈమె వేసిన ప్లాన్ అచ్చం సినిమా స్టైల్లో ఉంది. “2026లో జియో పొలిటికల్ యుద్ధాలు జరుగుతాయి, ఏ ఏ దేశాల మధ్య యుద్ధం జరుగుతుందో నాకు ముందే తెలుసు” అంటూ డైలాగులు కొట్టేది. “ప్రపంచ మార్కెట్ కుప్పకూలినా నా యాప్లో మాత్రం లాభాలు వస్తాయి” అని నమ్మించేది. కేవలం పెట్టుబడి సమాచారం ఇవ్వడానికే ఒక్కొక్కరి నుండి 25 వేల రూపాయల వరకు వసూలు చేసేది. ఆశ్చర్యకరమైన విషయం ఏమిటంటే, ఈమె డబ్బును కేవలం నగదు (Cash) రూపంలోనే తీసుకునేది. పెట్టుబడి పెట్టిన తర్వాత రెండేళ్ల వరకు తనను కాంటాక్ట్ చేయకూడదనే విచిత్రమైన షరతు కూడా విధించేది.
గుట్టు రట్టు
నగదు రూపంలో డబ్బు తీసుకుంటే ఎటువంటి ఆధారాలు ఉండవనేది మీనాక్షి కుతంత్రం. పది మందిని చేర్పించిన వారికి మాత్రమే ఇన్వెస్ట్మెంట్ వివరాలు చెబుతాననే రూల్ పెట్టింది. గంగావతి మరియు బెంగళూరుకు చెందిన వందలాది మంది మహిళలు ఈమె మాటలు నమ్మి ఇప్పుడు రోడ్డున పడ్డారు. ప్రస్తుతం బసవేశ్వరనగర్ పోలీసులు కేసు నమోదు చేసి, ఈ మోసపు జాలం ఎంతవరకు విస్తరించి ఉందో దర్యాప్తు చేస్తున్నారు. పెట్టుబడి పేరుతో ఇలాంటి ఆశలు చూపే వారి పట్ల ప్రజలే అప్రమత్తంగా ఉండాలని పోలీసులు సూచిస్తున్నారు.