2026 టీ20 ప్రపంచకప్ ఫైనల్‌లో భారత్ 255 పరుగుల భారీ స్కోరుతో రికార్డు సృష్టించింది. న్యూజిలాండ్‌ను భారీ పరుగుల తేడాతో ఓడించి, వరుసగా రెండోసారి.. మొత్తంగా మూడోసారి టీ20 ప్రపంచకప్‌ను కైవసం చేసుకుంది. మ్యాచ్‌కు ముందు “భారత అభిమానులను నిశ్శబ్దంగా ఉంచడమే మా లక్ష్యం” అని విర్రవీగిన కివీస్ కెప్టెన్ సాంట్నర్‌కు భారత జట్టు బ్యాటుతోనూ, బంతితోనూ సరైన సమాధానం ఇచ్చింది.
మ్యాచ్ హైలైట్స్: టాస్ గెలిచి తొలుత బ్యాటింగ్ చేసిన టీమ్ ఇండియా ఆది నుంచే విరుచుకుపడింది. ఓపెనర్ అభిషేక్ శర్మ 52 పరుగులతో మెరుపు ఆరంభాన్ని ఇవ్వగా, సంజూ శాంసన్ 89 పరుగులతో కివీస్ బౌలర్లను ఊచకోత కోశాడు. ఇషాన్ కిషన్ 54 పరుగులతో వేగంగా స్కోరును పెంచాడు. ఫలితంగా భారత్ నిర్ణీత 20 ఓవర్లలో 255 పరుగులు చేసింది. టీ20 ప్రపంచకప్ ఫైనల్ చరిత్రలో ఇదే అత్యధిక స్కోరు.
256 పరుగుల భారీ లక్ష్యంతో బరిలోకి దిగిన న్యూజిలాండ్, భారత బౌలర్ల ధాటికి విలవిలలాడింది. క్రమం తప్పకుండా వికెట్లు కోల్పోయిన కివీస్, 19 ఓవర్లలో 159 పరుగులకే కుప్పకూలింది. దీనితో భారత్ 96 పరుగుల భారీ తేడాతో చారిత్రక విజయాన్ని నమోదు చేసింది.
సాంట్నర్ వ్యాఖ్యలు – సూర్యకుమార్ సమాధానం: ఫైనల్‌కు ముందు సాంట్నర్ మాట్లాడుతూ.. “గోల్డ్ మెడల్ సాధించడానికి కొంతమంది భారతీయుల హృదయాలను ముక్కలు చేయడంలో నాకు ఎలాంటి బాధ లేదు. అహ్మదాబాద్ స్టేడియంలోని అభిమానులను సైలెంట్ చేయడమే మా లక్ష్యం” అని అన్నాడు. దీనిపై స్పందించిన భారత కెప్టెన్ సూర్యకుమార్ యాదవ్, “అందరూ పాత మాటలే చెబుతున్నారు.. కొత్తగా ఏదైనా చెప్పండి” అంటూ నవ్వుతూ కౌంటర్ ఇచ్చాడు. చివరికి భారత ఆటగాళ్లు తమ ప్రదర్శనతో సాంట్నర్ నోరు మూయించారు.