IND vs PAK, T20 World Cup 2026: టీ20 ప్రపంచకప్ 2026లో భారత్-పాకిస్థాన్ మధ్య మహా పోరు ఫిబ్రవరి 15న కొలంబోలోని ఆర్. ప్రేమదాస స్టేడియంలో జరగనుంది. రాజకీయ వివాదాలు, బహిష్కరణ హెచ్చరికల మధ్య ఎట్టకేలకు ఈ మ్యాచ్ ఖరారైంది.
అయితే, ఈ కీలక పోరుకు ముందు టీమ్ ఇండియా కొన్ని సవాళ్లను ఎదుర్కొంటోంది. నమీబియాపై విజయం సాధించినప్పటికీ, పాకిస్థాన్‌తో తలపడే ముందు భారత్‌ను ఆందోళనకు గురిచేస్తున్న ఆ 4 కారణాలు ఇవే:
1. అభిషేక్ శర్మ ఫిట్‌నెస్‌పై సందిగ్ధత: జట్టు విధ్వంసకర ఓపెనర్ అభిషేక్ శర్మ కడుపు సంబంధిత ఇన్ఫెక్షన్‌తో బాధపడుతున్నారు. తొలి మ్యాచ్ తర్వాత ఆయన ఆసుపత్రిలో చేరాల్సి వచ్చింది, దీనివల్ల నమీబియా మ్యాచ్‌కు దూరమయ్యారు. ప్రస్తుతం ఆయన డిశ్చార్జ్ అయినప్పటికీ, కెప్టెన్ సూర్యకుమార్ యాదవ్ సమాచారం ప్రకారం.. అతను పూర్తిగా కోలుకోవడానికి మరో ఒకటి రెండు మ్యాచ్‌లు పట్టవచ్చు. పాక్ వంటి కీలక మ్యాచ్‌లో అభిషేక్ అందుబాటులో లేకపోవడం టీమ్ ఇండియాకు పెద్ద ఎదురుదెబ్బ.
2. రింకూ సింగ్ ఫామ్ లేమి: మిడిల్ ఆర్డర్‌లో ఫినిషర్ పాత్ర పోషించే రింకూ సింగ్ ఈ టోర్నీలో ఇప్పటివరకు ఆకట్టుకోలేకపోయారు. తొలి మ్యాచ్‌లో 14 బంతుల్లో కేవలం 6 పరుగులే చేయగా, రెండో మ్యాచ్‌లో 6 బంతుల్లో 1 పరుగు మాత్రమే చేశారు. విధ్వంసకర బ్యాటింగ్‌కు పేరుగాంచిన రింకూ బ్యాట్ ప్రస్తుతం మౌనంగా ఉండటం టీమ్ మేనేజ్‌మెంట్‌ను కలవరపెడుతోంది.
3. స్పిన్నర్ల ముందు తడబడుతున్న బ్యాటర్లు: నమీబియాపై భారత్ 209 పరుగులు చేసినప్పటికీ, మిడిల్ ఓవర్లలో స్పిన్ బౌలింగ్‌ను ఎదుర్కోవడంలో బ్యాటర్లు ఇబ్బంది పడ్డారు. నమీబియా స్పిన్నర్లు బెర్నార్డ్ షోల్ట్జ్, గెర్హార్డ్ ఎరాస్మస్ వికెట్లు తీసి పరుగుల వేగాన్ని అడ్డుకున్నారు. పాకిస్థాన్ వద్ద పటిష్టమైన స్పిన్ అటాక్ ఉండటం, కొలంబో పిచ్ స్పిన్‌కు అనుకూలించే అవకాశం ఉండటం భారత్‌కు ప్రమాదకరంగా మారవచ్చు.
4. పవర్‌ప్లేలో బౌలింగ్ వైఫల్యం: నమీబియా వంటి జట్టుపై కూడా భారత బౌలర్లు పవర్‌ప్లేలో ధారాళంగా పరుగులు సమర్పించుకున్నారు. నమీబియా మొదటి 6 ఓవర్లలో ఒక వికెట్ నష్టానికి 57 పరుగులు చేసింది. పాకిస్థాన్ ఓపెనర్లు దూకుడుగా ఆడే ప్రమాదం ఉన్నందున, పవర్‌ప్లేలో భారత బౌలర్లు నియంత్రణ కోల్పోతే భారీ స్కోరు ఇచ్చే అవకాశం ఉంది.