లక్నో సూపర్ జెయింట్స్తో జరిగిన మ్యాచ్లో కోల్కతా బ్యాటర్ అంగకృష్ రఘువంశీ ఫీల్డింగ్కు ఆటంకం కలిగించినందుకు (Obstructing the Field) అవుట్ కావాల్సి వచ్చింది. 5వ ఓవర్ చివరి బంతికి రఘువంశీ మొదట పరుగు తీయడానికి ప్రయత్నించాడు, కానీ ఫీల్డర్ బంతిని విసిరే క్రమంలో వెనక్కి వచ్చేటప్పుడు బంతి అతడికి తగిలింది.
ఈ క్రమంలో రఘువంశీ కావాలనే బంతిని చూస్తూ అడ్డుగా వెళ్లాడని భావించిన థర్డ్ అంపైర్, అతడిని అవుట్గా ప్రకటించారు. దీంతో రఘువంశీ 8 బంతుల్లో 9 పరుగులు చేసి పెవిలియన్ చేరాడు. ఈ నిర్ణయంపై రఘువంశీ తీవ్ర అసంతృప్తి వ్యక్తం చేయగా, కోల్కతా కోచ్ అభిషేక్ నాయర్ అంపైర్లతో వాగ్వాదానికి దిగారు. ఐపీఎల్ 2026లో ఈ పద్ధతిలో అవుట్ అయిన మొదటి ఆటగాడిగా 21 ఏళ్ల రఘువంశీ నిలిచాడు.
అసలేం జరిగింది? లక్నో బౌలర్ ప్రిన్స్ యాదవ్ వేసిన 5వ ఓవర్ చివరి బంతిని రఘువంశీ మిడ్-ఆన్ వైపు ఆడాడు. పరుగు కోసం ప్రయత్నించిన రఘువంశీని నాన్-స్ట్రైకర్ గ్రీన్ వెనక్కి పంపాడు. రఘువంశీ డైవ్ చేస్తూ క్రీజులోకి వచ్చే క్రమంలో ఫీల్డర్ విసిరిన బంతి అతడికి తగిలింది. షమీ వెంటనే ‘అబ్స్ట్రక్టింగ్ ద ఫీల్డ్’ కోసం అప్పీల్ చేయగా, ఆన్-ఫీల్డ్ అంపైర్లు ఈ నిర్ణయాన్ని థర్డ్ అంపైర్కు బదిలీ చేశారు. రీప్లేలను పరిశీలించిన థర్డ్ అంపైర్ రఘువంశీ కావాలనే బంతి దిశను గమనిస్తూ అడ్డుపడ్డాడని తేల్చి అవుట్ ఇచ్చారు.
చరిత్రలో నాలుగో ఆటగాడు: ఐపీఎల్ చరిత్రలో ఈ విధంగా ‘అబ్స్ట్రక్టింగ్ ద ఫీల్డ్’ ద్వారా అవుట్ అయిన నాలుగో ఆటగాడిగా రఘువంశీ రికార్డుల్లోకెక్కాడు. గతంలో ఈ విధంగా అవుట్ అయిన ఆటగాళ్ల జాబితా ఇక్కడ ఉంది:
- యూసుఫ్ పఠాన్ – వర్సెస్ పూణే వారియర్స్, 2013
- అమిత్ మిశ్రా – వర్సెస్ సన్ రైజర్స్ హైదరాబాద్, 2019
- రవీంద్ర జడేజా – వర్సెస్ రాజస్థాన్ రాయల్స్, 2024
- అంగకృష్ రఘువంశీ – వర్సెస్ లక్నో సూపర్ జెయింట్స్, 2026
ఏమిటీ ‘అబ్స్ట్రక్టింగ్ ద ఫీల్డ్’ నియమం? క్రికెట్ నిబంధనల ప్రకారం.. ఒక బ్యాటర్ పరుగు తీసే క్రమంలో లేదా క్యాచ్ పట్టే సమయంలో ఫీల్డర్లకు కావాలనే అడ్డుపడితే, అంపైర్ ఆ బ్యాటర్ను అవుట్గా ప్రకటించవచ్చు. ఒకవేళ అది అనుకోకుండా జరిగితే అవుట్ ఇవ్వరు, కానీ బ్యాటర్ ఉద్దేశపూర్వకంగా బంతికి లేదా ఫీల్డర్కు అడ్డుగా వెళ్లాడని అంపైర్ భావిస్తే అవుట్ ఇచ్చే అధికారం అతడికి ఉంటుంది.