ప్రపంచంలోనే అత్యంత ధనిక లీగ్ అయిన ఐపీఎల్, అత్యాధునిక సాంకేతికతను (Hawk-Eye, Ultra-edge) వాడుతున్నప్పటికీ మానవ తప్పిదాల వల్ల తరచుగా వార్తల్లో నిలుస్తోంది. తాజా సీజన్ 2026లో అంపైర్ల నిర్ణయాలు మ్యాచ్ ఫలితాలనే మార్చేయడంపై అభిమానులు మండిపడుతున్నారు.
- రజత్ పటీదార్ అవుట్ – జేసన్ హోల్డర్ క్యాచ్
రాయల్ ఛాలెంజర్స్ బెంగళూరు (RCB) కెప్టెన్ రజత్ పటీదార్ను అవుట్ చేయడానికి గుజరాత్ టైటాన్స్ ఆటగాడు జేసన్ హోల్డర్ బౌండరీ వద్ద అద్భుతమైన క్యాచ్ పట్టాడు. హోల్డర్కు బంతిపై పూర్తి నియంత్రణ ఉందని థర్డ్ అంపైర్ భావించారు. కానీ రీప్లేలో బంతి నేలను తాకినట్లు స్పష్టంగా కనిపించింది. ఈ నిర్ణయంతో విరాట్ కోహ్లీ తీవ్ర ఆగ్రహానికి గురవ్వగా, సోషల్ మీడియాలో అంపైరింగ్ ప్రమాణాలపై చర్చ మొదలైంది. - హెన్రిచ్ క్లాసెన్ ఆగ్రహం
సీజన్ మొదటి రోజే సన్రైజర్స్ హైదరాబాద్ (SRH) బ్యాటర్ హెన్రిచ్ క్లాసెన్ను థర్డ్ అంపైర్ రోహన్ పండిట్ అవుట్ ఇచ్చారు. ఆర్సీబీ ఆటగాడు ఫిల్ సాల్ట్ బౌండరీ వద్ద క్యాచ్ పట్టగా, అతని పాదం బౌండరీ కుషన్ను తాకినట్లు రీప్లేలో కనిపించింది. అది సిక్స్ ఇవ్వాల్సింది పోయి అవుట్ ఇవ్వడంపై నెటిజన్లు ‘అంపైరింగ్ బ్లండర్’ అంటూ విమర్శించారు. - ఫిన్ అలెన్: తొందరపాటు నిర్ణయం
లక్నో సూపర్ జైంట్స్ (LSG)తో జరిగిన మ్యాచ్లో కోల్కతా నైట్ రైడర్స్ (KKR) బ్యాటర్ ఫిన్ అలెన్ను థర్డ్ అంపైర్ కె.ఎన్. అనంత పద్మనాభన్ అవుట్ ఇచ్చారు. ఫీల్డర్ దిగ్వేష్ రాఠీ క్యాచ్ పట్టినప్పుడు అతని పాదం బౌండరీ కుషన్ను తాకినట్లు అనుమానం ఉన్నా, అంపైర్ లోతుగా సమీక్షించకుండానే నిర్ణయం ప్రకటించారు. ఈ మ్యాచ్లో కెకెఆర్ ఓడిపోవడం అభిమానుల ఆగ్రహాన్ని రెట్టింపు చేసింది. - అంగ్క్రిష్ రఘువంశీ: ఫీల్డ్ను అడ్డుకోవడం (Obstructing the field)
ఎల్ఎస్జీతో జరిగిన పోరులో రఘువంశీని ‘అబ్స్ట్రక్టింగ్ ద ఫీల్డ్’ కింద అవుట్ ఇచ్చారు. మహమ్మద్ షమీ విసిరిన బంతి క్రీజులోకి పరుగెడుతున్న రఘువంశీకి తగిలింది. అతను కావాలనే బంతికి అడ్డుపడ్డాడని అంపైర్ భావించారు. కేకేఆర్ అభిమానులు దీనిని తప్పుబట్టినప్పటికీ, ఎంసీసీ (MCC) మాత్రం అంపైర్ నిర్ణయాన్ని సమర్థించింది. - రిషబ్ పంత్ కొట్టిన సిక్స్.. ఫోర్ అయ్యింది!
అత్యంత విచిత్రమైన ఘటన ఏమిటంటే.. రిషబ్ పంత్ కొట్టిన క్లియర్ సిక్స్ను ఆన్-ఫీల్డ్ అంపైర్లు ఫోర్గా ప్రకటించారు. కనీసం థర్డ్ అంపైర్ను కూడా సంప్రదించకుండానే ఈ నిర్ణయం తీసుకున్నారు. దురదృష్టవశాత్తూ ఆ మ్యాచ్ సూపర్ ఓవర్కు వెళ్లడం, అందులో ఎల్ఎస్జీ ఓడిపోవడంతో ఈ అంపైరింగ్ తప్పిదం మ్యాచ్ ఫలితాన్ని మార్చేసినట్లయింది.