న్యూఢిల్లీ: ఐపీఎల్ తొలి సీజన్ ఛాంపియన్ రాజస్థాన్ రాయల్స్ (RR) సరికొత్త చరిత్ర సృష్టించబోతోంది. ఐపీఎల్ 19వ సీజన్‌కు (2026) ముందే ఈ జట్టుకు కొత్త యజమాని దొరికారు. భారత సంతతికి చెందిన అమెరికన్ వ్యాపారవేత్త కాల్ సోమాని నేతృత్వంలోని గ్రూప్ ఈ ఫ్రాంచైజీని కొనుగోలు చేసింది.
ఈ డీల్ ప్రకారం, రాజస్థాన్ రాయల్స్ జట్టు 1.63 బిలియన్ డాలర్ల (సుమారు ₹15,282 కోట్లు) భారీ ధరకు విక్రయించబడింది. ఐపీఎల్ చరిత్రలోనే ఒక జట్టు 1 బిలియన్ డాలర్ల మార్కును దాటడం ఇదే మొదటిసారి.
ఎవరీ కాల్ సోమాని? రాజస్థాన్ రాయల్స్ కొత్త యజమాని కాల్ సోమాని టెక్నాలజీ మరియు ఇన్వెస్ట్‌మెంట్ రంగంలో దిగ్గజం. డేటా ప్రైవసీ, ఆర్టిఫిషియల్ ఇంటెలిజెన్స్ (AI), స్పోర్ట్స్ టెక్ వంటి రంగాల్లో ఆయన అంతర్జాతీయ సంస్థలను స్థాపించారు. విశేషమేమిటంటే, సోమాని గతంలోనే రాజస్థాన్ రాయల్స్ జట్టులో మైనారిటీ వాటాదారుగా ఉన్నారు. ఇప్పుడు వాల్‌మార్ట్ కుటుంబానికి చెందిన రాబ్ వాల్టన్ వంటి దిగ్గజాల మద్దతుతో పూర్తి వాటాను సొంతం చేసుకున్నారు.
24 రెట్లు పెరిగిన విలువ:
- 2008లో: రాజస్థాన్ రాయల్స్ జట్టును కొనుగోలు చేసినప్పుడు దాని ధర కేవలం 67 మిలియన్ డాలర్లు (అప్పట్లో సుమారు ₹270 కోట్లు).
- 2026లో: అదే జట్టు విలువ ఇప్పుడు 1.63 బిలియన్ డాలర్లకు (₹15,289 కోట్లు) చేరింది. అంటే, గత 18 ఏళ్లలో ఈ ఫ్రాంచైజీ విలువ సుమారు 24 రెట్లు పెరగడం గమనార్హం.
ఐపీఎల్ చరిత్రలో అతిపెద్ద డీల్: గత ఏడాది గుజరాత్ టైటాన్స్ జట్టులో 67% వాటాను టొరెంట్ గ్రూప్ ₹5,025 కోట్లకు కొనుగోలు చేసింది, అప్పుడు ఆ జట్టు విలువ ₹7,500 కోట్లుగా లెక్కించారు. కానీ ఇప్పుడు రాజస్థాన్ రాయల్స్ ఏకంగా ₹15 వేల కోట్లు పలకడంతో ఐపీఎల్ మార్కెట్ విలువ అమాంతం పెరిగిపోయింది. బ్రిటీష్ పారిశ్రామికవేత్త మనోజ్ బదాలే నేతృత్వంలోని బృందం నుండి ఇప్పుడు ఈ జట్టు అమెరికన్ ఇన్వెస్టర్ల చేతికి వెళ్తోంది.