పెళ్లి కొడుకులను ఏమైనా అమెజాన్ నుండి ఆర్డర్ చేయగలమా? లేదా కెరీర్ పరుగు పందెంలో పడి సరైన వివాహ వయసును దాటేస్తున్నామా? సోషల్ మీడియాలో వైరల్ అవుతున్న ఒక వీడియో ఇప్పుడు ఈ ప్రశ్నలను లేవనెత్తింది.
వైరల్ వీడియోలో ఒక తల్లి, తన MBBS-MD చదివిన డాక్టర్ కుమార్తెకు నచ్చిన వరుడు దొరకడం లేదని తన బాధను వ్యక్తపరిచారు. ఇన్‌స్టాగ్రామ్ క్రియేటర్ సోనమ్ సోలంకి షేర్ చేసిన ఈ వీడియోను ఇప్పటికే 75 లక్షల మందికి పైగా వీక్షించారు.
32-34 ఏళ్ల అబ్బాయిలు ‘అంకుల్స్’ లా ఉన్నారు!
ఆ తల్లి తన వీడియోలో ఇలా పేర్కొన్నారు:
- తన కుమార్తె చదువు కోసం చాలా సంవత్సరాలు కేటాయించిందని, ప్రస్తుతం ఆమె విజయవంతమైన, ఫిట్‌గా ఉండే స్మార్ట్ డాక్టర్ అని చెప్పారు.
- కానీ ఆమె వయసు (30-32 ఏళ్లు) ఉన్న డాక్టర్లనే వరులుగా చూడటం మొదలుపెట్టినప్పుడు తనకు నిరాశే ఎదురైందని తెలిపారు.
- 32-34 ఏళ్ల వయసున్న అబ్బాయిలు ఆమెకు ‘అంకుల్స్’ లా కనిపిస్తున్నారట. ఎవరిని చూసినా బట్టతల లేదా అధిక బరువు (పొట్ట) తో ఉన్నారని ఆమె ఫిర్యాదు చేశారు.
నెటిజన్ల రియాక్షన్: “34 ఏళ్ల అమ్మాయి ఆంటీ కాదా?”
ఈ వ్యాఖ్యలపై సోషల్ మీడియాలో (ముఖ్యంగా X వేదికగా) పెద్ద యుద్ధమే నడుస్తోంది. నెటిజన్లు ఆ తల్లికి ఘాటుగానే సమాధానాలిస్తున్నారు:
- వయసు అందరికీ ఒకటే: “34 ఏళ్ల అబ్బాయి అంకుల్ అయితే, 34 ఏళ్ల అమ్మాయి ఆంటీ ఎందుకు కాదు? జీవ గడియారం (Biological Clock) అందరికీ ఒకేలా ఉంటుంది కదా!” అని ఒక వినియోగదారు ప్రశ్నించారు.
- అమెజాన్ ప్రొడక్ట్ కాదు: “మనుషులు ఫ్యాక్టరీలో తయారయ్యే వస్తువులు కాదు.. నచ్చినట్లు ఆర్డర్ ఇవ్వడానికి” అని డాక్టర్ ఆర్.సి. శర్మ అనే నెటిజన్ విమర్శించారు.
- మెచ్యూరిటీ ముఖ్యం: 30 ఏళ్లు దాటాక అందం కంటే స్వభావం, ఒకరికొకరు సరిపోతారా లేదా (Compatibility) అనే విషయాలకు ప్రాధాన్యత ఇవ్వాలని, జుట్టు లేదా బరువు కాలక్రమేణా మారేవేనని చాలామంది సూచించారు.