పలు ప్రాంతాల్లో ప్రస్తుతం ఎండలు మండిపోతున్నాయి. ఉష్ణోగ్రతలు 41 డిగ్రీల సెల్సియస్ను దాటాయి. కొన్ని చోట్ల వచ్చే 48 గంటల్లో వర్షం కురిసే అవకాశం ఉందని వాతావరణ శాఖ (IMD) హెచ్చరించింది.
ఏప్రిల్ ముగిసి మే నెల ప్రారంభం కాబోతోంది. జూన్లో వర్షాకాలం దేశవ్యాప్తంగా విస్తరిస్తుంది. అయితే, ఈ ఏడాది వర్షపాతం ఎలా ఉండబోతుందనే దానిపై సర్వత్రా ఉత్కంఠ నెలకొంది. ఎందుకంటే దేశ ఆర్థిక వ్యవస్థ మెజారిటీ భాగం రుతుపవనాలపైనే ఆధారపడి ఉంటుంది.
పెరుగుతున్న ఆందోళన: వాతావరణ శాఖ వెల్లడించిన తాజా అంచనాలు దేశంతో పాటు రాష్ట్రానికి కూడా ఆందోళన కలిగిస్తున్నాయి. ఈ ఏడాది వర్షాలపై ‘ఎల్ నినో’ (El Nino) ప్రభావం ఉండే అవకాశం ఉంది. పసిఫిక్ మహాసముద్రంలో ఎల్ నినోకు అనుకూల పరిస్థితులు ఏర్పడుతున్నాయి, దీని ఫలితంగానే రాష్ట్రంలో ఎండల తీవ్రత పెరిగింది. ఒకవేళ ఎల్ నినో ప్రభావం బలంగా ఉంటే, రాష్ట్రంలో సగటు కంటే తక్కువ వర్షపాతం నమోదయ్యే అవకాశం ఉంది. గత ఏడాది భారీ వర్షాల వల్ల రైతులు నష్టపోగా, ఈ ఏడాది వర్షాలు తగ్గితే అన్నదాతలు మరిన్ని కష్టాల్లోకి నెట్టబడే ప్రమాదం ఉంది.