దీర్ఘకాలిక పెట్టుబడుల కోసం చూస్తున్న మధ్యతరగతి కుటుంబాలు, ఉద్యోగులు మరియు పదవీ విరమణ (రిటైర్మెంట్) జీవితం కోసం ప్లాన్ చేసుకుంటున్న వారికి పబ్లిక్ ప్రావిడెంట్ ఫండ్ (PPF) నేటికీ అత్యంత విశ్వసనీయమైన ఎంపికగా నిలిచింది. కేంద్ర ప్రభుత్వమే స్వయంగా నడుపుతున్న ఈ పథకంలో చిన్న మొత్తంతో ప్రారంభమయ్యే పెట్టుబడులు (Investments) కాలక్రమేణా భారీ నిధిగా మారగలవు.
ఇది పూర్తిగా సురక్షితమైన పెట్టుబడి మరియు స్థిరమైన ఆదాయాన్ని అందిస్తుంది కాబట్టి, ఇటీవల కాలంలో పిపిఎఫ్ క్రేజ్ మరింత పెరిగింది.
7.1 శాతం వార్షిక వడ్డీ గ్యారెంటీ ప్రస్తుతం పిపిఎఫ్ ఖాతాపై వార్షిక వడ్డీ రేటు (Interest Rate) 7.1 శాతంగా ఉంది. ఇది పూర్తిగా ప్రభుత్వ గ్యారెంటీ ఉన్న పథకం కావడంతో, షేర్ మార్కెట్ హెచ్చుతగ్గుల భయం లేకుండా, ఎలాంటి రిస్క్ లేకుండా డబ్బు పెట్టుబడి పెట్టవచ్చు. చాలా మంది దీర్ఘకాలిక సంపద సృష్టికి మరియు పన్ను ప్రయోజనాలను పొందడానికి దీనినే మొదటి ఎంపికగా పరిగణిస్తారు.
మూడు దశల్లోనూ పన్ను మినహాయింపు! ఈ పథకంలో సంవత్సరానికి గరిష్టంగా ₹1.5 లక్షల పెట్టుబడికి ఆదాయపు పన్ను చట్టం సెక్షన్ 80C కింద పన్ను మినహాయింపు లభిస్తుంది. అయితే గమనించండి, ఈ బెనిఫిట్ పాత పన్ను విధానంలో (Old Tax Regime) మాత్రమే అందుబాటులో ఉంది, కొత్త పన్ను విధానంలో (New Tax Regime) లభించదు. దీని అత్యంత పెద్ద ప్లస్ పాయింట్ ఏంటంటే.. పెట్టుబడి పెట్టే మొత్తం, వచ్చే వడ్డీ మరియు మెచ్యూరిటీ ద్వారా వచ్చే డబ్బు.. ఈ మూడింటికీ ఎలాంటి పన్ను ఉండదు. దీనిని ట్రిపుల్ ఇ (EEE – Exempt, Exempt, Exempt) సదుపాయం అంటారు.
నెలకు కేవలం 100 రూపాయలతో కూడా ప్రారంభించవచ్చు మీకు సమీపంలో ఉన్న పోస్టాఫీసులు (Post Offices), ప్రభుత్వ బ్యాంకులు లేదా ప్రముఖ ప్రైవేట్ బ్యాంకులలో సులభంగా పిపిఎఫ్ ఖాతాను ఓపెన్ చేయవచ్చు. నెలకు కనీసం ₹100 నుండి ₹500 డిపాజిట్ చేసి కూడా మీ అకౌంట్ను యాక్టివ్గా ఉంచుకోవచ్చు. ఖాతా తెరవడానికి మీ కేవైసీ (KYC) పత్రాలు, అప్లికేషన్ మరియు పాస్పోర్ట్ సైజ్ ఫోటో ఉంటే సరిపోతుంది.
45వ ఏట పెట్టుబడి పెడితే ఎంత వస్తుంది? ఉదాహరణకు, మీరు మీ 45వ ఏట నెలకు కేవలం ₹2,000 పెట్టుబడి పెట్టడం ప్రారంభిస్తే, తదుపరి 15 సంవత్సరాలలో మీ మొత్తం పెట్టుబడి ₹3.60 లక్షలు అవుతుంది. దీనిపై మీకు సుమారు ₹2.90 లక్షల వడ్డీ లభిస్తుంది, మీ 60వ ఏట పదవీ విరమణ చేసే సమయానికి చేతికి మొత్తం ₹6.50 లక్షలు అందుతాయి.
40వ ఏట పెట్టుబడి పెడితే 10 లక్షలకు పైగా లాభం ఒకవేళ మీరు 40 ఏళ్ల వయస్సు నుండే నెలకు ₹2,000 ఆదా చేయడం ప్రారంభిస్తే, తదుపరి 20 సంవత్సరాలలో మీరు కట్టే డబ్బు ₹4.80 లక్షలు మాత్రమే. కానీ చక్రవడ్డీ (Compound Interest) మ్యాజిక్ కారణంగా ఏకంగా ₹5.85 లక్షల వడ్డీయే లభిస్తుంది! ఖాతా మెచ్యూరిటీ అయ్యేసరికి మీ చేతికి మొత్తం ₹10.65 లక్షల డబ్బు రావడం గ్యారెంటీ.
చిన్న వయస్సులోనే పెట్టుబడి పెడితే 52 లక్షల నిధి! పెట్టుబడిని ఎంత త్వరగా ప్రారంభిస్తే అంత లాభం ఎక్కువ. 20 ఏళ్ల యువకుడు 40 సంవత్సరాల పాటు నెలకు ₹2,000 పెట్టుబడి పెడుతూ పోతే, అతడు కట్టే మొత్తం కేవలం ₹9.60 లక్షలు. కానీ అతనికి లభించే వడ్డీయే ₹43 లక్షల కంటే ఎక్కువ! అంటే 60 ఏళ్లు నిండేసరికి అతని ఖాతాలో ₹52 లక్షల కంటే ఎక్కువ డబ్బు జమ అవుతుంది.
పిల్లల పేరుతో ఖాతా తెరిచి 1 కోటి అధిపతిని చేయవచ్చు! మీ బిడ్డ 10 ఏళ్ల వయస్సులో ఉన్నప్పుడు తల్లిదండ్రులు వారి పేరు మీద పిపిఎఫ్ అకౌంట్ తెరిపించి, నెలకు ₹2,000 పెట్టుబడి పెడుతూ, దానిని 50 సంవత్సరాల పాటు కొనసాగిస్తే.. మొత్తం ₹12 లక్షల పెట్టుబడిపై సుమారు ₹96 లక్షల వడ్డీ లభిస్తుంది. మెచ్యూరిటీ సమయంలో ఆ బిడ్డకు మొత్తం ₹1.08 కోట్ల భారీ మొత్తం లభ్యమవుతుంది. పిపిఎఫ్ కాలపరిమితి 15 సంవత్సరాలైనప్పటికీ, ఆ తర్వాత ప్రతి 5 ఏళ్లకొకసారి దీనిని పొడిగించుకోవచ్చు.