గురువారం, ఫిబ్రవరి 5 రాత్రి స్మృతి మంధాన నేతృత్వంలోని రాయల్ ఛాలెంజర్స్ బెంగళూరు (RCB), ఢిల్లీ క్యాపిటల్స్‌ను ఓడించి WPL 2026 టైటిల్‌ను కైవసం చేసుకుంది. అయితే, విజయం ఖరారయ్యే ముందు మైదానంలో కొంత డ్రామా నడిచింది.
చివరి ఓవర్‌లో రాధా యాదవ్ విన్నింగ్ షాట్ కొట్టిన వెంటనే ఆర్సీబీ ఆటగాళ్లు సంబరాలు మొదలుపెట్టారు. కానీ, అంపైర్లు స్టంప్స్ పై Bails కింద పడి ఉండటం గమనించి, ప్లేయర్లను ఆపారు. రాధా యాదవ్ ‘హిట్ వికెట్’ అయ్యిందా అనే అనుమానంతో అంపైర్లు చర్చించుకున్నారు. కొద్దిసేపు ఉత్కంఠ నెలకొన్నప్పటికీ, రిప్లే చూసిన తర్వాత అంపైర్లు ఆర్సీబీని విజేతగా ప్రకటించారు.
అసలు వివాదం ఏమిటి? 204 పరుగుల లక్ష్యంతో బరిలోకి దిగిన ఆర్సీబీకి చివరి ఓవర్‌లో 10 పరుగులు కావాలి. రాధా యాదవ్ వరుసగా ఫోర్లు కొట్టి జట్టును గెలిపించింది. అయితే బంతి బౌండరీకి వెళ్లే సమయంలో Bails కింద పడ్డాయి. టీవీ రిప్లేలో ఆ Bails రాధా యాదవ్ వల్ల కాకుండా, ఢిల్లీ వికెట్ కీపర్ లిజెల్ లీ గ్లౌవ్స్ తగలడం వల్ల పడ్డాయని స్పష్టమైంది. దీంతో అంపైర్లు దానిని ఫోర్‌గా ప్రకటించి, ఆర్సీబీ విజయాన్ని ధృవీకరించారు.
మ్యాచ్ సారాంశం: స్మృతి మంధాన (87), జార్జియా వోల్ (79) అద్భుత అర్ధశతకాలతో రాణించడంతో ఆర్సీబీ 19.4 ఓవర్లలో లక్ష్యాన్ని ఛేదించింది. దీంతో ఆర్సీబీ రెండోసారి WPL టైటిల్‌ను గెలుచుకోగా, ఢిల్లీ వరుసగా నాలుగోసారి ఫైనల్లో ఓటమి పాలైంది.