నాసిక్: టీసీఎస్ (TCS) నాసిక్ యూనిట్లో కలకలం రేపిన లైంగిక వేధింపులు మరియు మతపరమైన మనోభావాల దెబ్బతీత కేసులో కొత్త కోణం వెలుగులోకి వచ్చింది. ఈ కేసులో అరెస్ట్ అయిన ఏడుగురు ఉద్యోగులలో ఒకరి భార్య, తన భర్త నిర్దోషి అని, కేవలం ఒక వ్యక్తి చేసిన తప్పులో అందరినీ ఇరికించారని ఆవేదన వ్యక్తం చేశారు.
ఒకరి బంధం.. అందరికీ శాపం!
“దానిష్ షేక్ మరియు ఒక మహిళ మధ్య విఫలమైన ప్రేమాయణం మిగిలిన వారందరి జీవితాలను రోడ్డున పడేసింది” అని సదరు మహిళ వాపోయారు. దానిష్పై అత్యాచారం, మత మార్పిడి ప్రేరేపణ వంటి తీవ్రమైన ఆరోపణలు ఉండగా, మిగిలిన ఆరుగురిని కూడా అదే కోవలో చేర్చి పోలీసులు 9 ఎఫ్ఐఆర్ (FIR)లు నమోదు చేయడంపై ఆమె మండిపడ్డారు.
అసలేం జరిగిందంటే?
పోలీసుల కథనం ప్రకారం.. దానిష్ షేక్ తనకి పెళ్లయిన విషయాన్ని దాచిపెట్టి, సహోద్యోగితో సంబంధం పెట్టుకున్నాడు. తీరా అతనికి భార్యాపిల్లలు ఉన్నారని తెలియడంతో ఆ మహిళ పోలీసులను ఆశ్రయించింది. అయితే, ఈ గొడవలోకి తన భర్తను ఎలా లాగుతారని బాధితుడి భార్య ప్రశ్నిస్తున్నారు.
- “దానిష్తో నా భర్తకు కేవలం హాయ్, బై పరిచయం తప్ప మరేమీ లేదు.”
- “ఏప్రిల్ 1న కేవలం సంతకం పెట్టాలని పిలిచి, రాత్రికి రాత్రి అరెస్ట్ చేశారు.”
- “మతపరమైన మనోభావాలు దెబ్బతీశారనే ఆరోపణల్లో నిజం లేదు. నా భర్త కేవలం శాకాహారమే తింటారు, అలాంటి వ్యక్తి ఇతరుల మతం గురించి తప్పుగా ఎలా మాట్లాడతారు?” అని ఆమె ప్రశ్నించారు.
యాజమాన్యం వేటు – పోలీసుల విచారణ
టాటా సన్స్ చైర్మన్ ఎన్. చంద్రశేఖరన్ ఈ ఘటనపై స్పందిస్తూ.. లోతైన విచారణ జరుగుతోందని తెలిపారు. ఇప్పటికే ఆరోపణలు ఎదుర్కొంటున్న వారందరినీ కంపెనీ సస్పెండ్ చేసింది. మరోవైపు, ‘పోష్’ (PoSH) కమిటీ సభ్యురాలు అశ్విని చైనానీని కూడా పోలీసులు అదుపులోకి తీసుకున్నారు. బాధితులు ఫిర్యాదు చేసినా ఆమె పట్టించుకోలేదనేది పోలీసుల వాదన.
9 ఎఫ్ఐఆర్లు.. సీరియస్ సెక్షన్లు
ఈ కేసులో ఇప్పటివరకు 9 ఎఫ్ఐఆర్లు నమోదయ్యాయి. ఒకరిపై అత్యాచార ఆరోపణలు ఉండగా, మిగిలిన వారిపై అసభ్య ప్రవర్తన, డబుల్ మీనింగ్ మాటలు, అక్రమంగా తాకడం వంటి సెక్షన్ల కింద కేసులు పెట్టారు. మెజిస్ట్రేట్ ముందు బాధితుల స్టేట్మెంట్లు రికార్డ్ చేశామని, విచారణ ఆధారంగా చార్జిషీట్ దాఖలు చేస్తామని సిట్ (SIT) అధికారులు స్పష్టం చేశారు.