ప్రస్తుత రోజుల్లో తన బ్యాటింగ్‌తో ప్రపంచాన్ని తనవైపు తిప్పుకునేలా చేస్తున్న భారత క్రికెట్ యువతార వైభవ్ సూర్యవంశీ తన మెరుపు బ్యాటింగ్‌ను కొనసాగిస్తున్నాడు. ఇటీవల ముగిసిన రైజింగ్ స్టార్ ఆసియా కప్ T20 ఫార్మాట్ టోర్నమెంట్‌లో కేవలం 32 బంతుల్లోనే సెంచరీ సాధించిన వైభవ్, ఇప్పుడు 19 ఏళ్లలోపు వన్డే ఫార్మాట్ ఆసియా కప్‌లోనూ మెరుపు శతకం బాదాడు.
కేవలం 56 బంతుల్లోనే సెంచరీ
యూఏఈ (UAE) తో ప్రారంభమైన 19 ఏళ్లలోపు వన్డే ఫార్మాట్ ఆసియా కప్‌లోని మొదటి మ్యాచ్‌లో వైభవ్ సూర్యవంశీ 56 బంతుల్లో సెంచరీ సాధించి మెరిశాడు. సెంచరీ తర్వాత మరింత ధాటిగా బ్యాటింగ్ చేసిన వైభవ్, చివరికి 95 బంతుల్లో 171 పరుగులు చేసి ఉదీష్ సూరికి వికెట్ అప్పగించి వెనుదిరిగాడు.
14 సిక్సర్లు, 9 బౌండరీలు
టాస్ ఓడి ముందుగా బ్యాటింగ్ చేసిన భారత జట్టుకు మంచి ఆరంభం లభించలేదు. కెప్టెన్ ఆయుష్ మ్హాత్రే 4 పరుగులు చేసి పెవిలియన్‌కు చేరుకున్నాడు. అయితే, ఆరోన్ జార్జ్‌తో కలిసి ఆడిన వైభవ్ సూర్యవంశీ యూఏఈ బౌలర్లను ఒత్తిడికి గురిచేశాడు. తన మెరుపు ఇన్నింగ్స్‌లో 14 సిక్సర్లు మరియు 9 అద్భుతమైన బౌండరీలతో సహా 171 పరుగులు చేసి అవుటయ్యాడు.