రైలు ప్రయాణాల్లో ముఖ్యంగా ఉత్తర భారత దేశానికి వెళ్లే రైళ్లలో ట్రాన్స్‌జెండర్ల (మంగళముఖి) హంగామా తరచూ వార్తల్లో నిలుస్తోంది. ఆశీర్వదించి డబ్బులు తీసుకోవడం వరకు పర్వాలేదు కానీ, ఈ మధ్యకాలంలో కొందరి ప్రవర్తన హద్దులు మీరుతోంది. తాజాగా ఒక రైలులో జరిగిన ఘటన ప్రయాణికులను తీవ్ర దిగ్భ్రాంతికి గురి చేయడమే కాకుండా, పబ్లిక్ ట్రాన్స్‌పోర్ట్‌లో భద్రతపై ఆందోళన రేకెత్తిస్తోంది.
డబ్బులు ఇవ్వలేదని బట్టలు విప్పి..
సాధారణంగా రైలులో ట్రాన్స్‌జెండర్లు డబ్బులు అడిగినప్పుడు ప్రయాణికులు తమకు తోచినంత ఇస్తుంటారు. అయితే, ఒక రైలులో మాత్రం పరిస్థితి వికటించింది. ఒక ట్రాన్స్‌జెండర్ ప్రయాణికుడిని డబ్బులు అడగగా, అతను నిరాకరించాడు. దీంతో ఆగ్రహానికి లోనైన సదరు ట్రాన్స్‌జెండర్, అందరూ చూస్తుండగానే ఒంటిపై ఉన్న బట్టలు విప్పేసి అత్యంత అసభ్యకరంగా ప్రవర్తించింది. తోటి ప్రయాణికులు, మహిళలు, పిల్లలు ఉన్నారనే కనీస విచక్షణ లేకుండా ప్రవర్తించిన తీరుపై సోషల్ మీడియాలో ఆగ్రహం వ్యక్తమవుతోంది.
మౌనమే ముప్పుగా మారుతోందా?
గతంలోనూ ఇటువంటి ఘటనలు అనేకం వెలుగులోకి వచ్చాయి. డబ్బులు ఇవ్వకపోతే కొట్టడం, దూషించడం, బలవంతంగా లాక్కోవడం వంటి పనులు చేస్తున్న వీడియోలు నెట్టింట వైరల్ అవుతున్నాయి. రైల్వే పోలీసులు (RPF/GRP) ఇలాంటి వారిపై కఠిన చర్యలు తీసుకోవడంలో విఫలమవుతున్నారని ప్రయాణికులు వాపోతున్నారు.
ప్రయాణికుల ఆవేదన
“రైలులో ప్రశాంతంగా ప్రయాణించే పరిస్థితి లేదు. ఒక్కోసారి వీరు గుంపులుగా వచ్చి బెదిరిస్తుంటారు. అడిగినంత ఇవ్వకపోతే శాపనార్థాలు పెడుతూ, అసభ్యంగా ప్రవర్తిస్తున్నారు. రైల్వే శాఖ ఈ అరాచకాలపై దృష్టి సారించాలి” అని ప్రయాణికులు కోరుతున్నారు.
సామాజిక వర్గంగా వారికి గౌరవం ఇవ్వడం అందరి బాధ్యత, కానీ అదే ముసుగులో ప్రయాణికులను వేధింపులకు గురిచేయడం నేరమని చట్ట నిపుణులు హెచ్చరిస్తున్నారు.