WhatsApp ప్రైవసీ కేసు: WhatsAppలో మీ వ్యక్తిగత చాట్‌లు నిజంగా ప్రైవేట్‌గా ఉన్నాయా, లేదా కంపెనీ చేస్తున్న ప్రైవసీ వాదనలు అబద్ధమా? అమెరికాలోని శాన్ ఫ్రాన్సిస్కో కోర్టులో మెటా కంపెనీపై ఒక కేసు దాకలవడంతో ఈ ప్రశ్న ఇప్పుడు చర్చనీయాంశమైంది.
WhatsApp ప్రైవసీకి సంబంధించిన వాదనలు సరైనవి కావని ఈ కేసులో ఆరోపణలు వచ్చాయి. మెటా మరియు WhatsApp వినియోగదారుల వ్యక్తిగత చాట్‌లను స్టోర్ చేస్తాయని, వాటిని విశ్లేషిస్తాయని (Analysis), అవసరమైనప్పుడు వాటిని చూడగలవని కూడా అందులో పేర్కొన్నారు. అయితే, మెటా ఈ ఆరోపణలను పూర్తిగా తోసిపుచ్చింది, ఈ కేసు నిరాధారమైనదని మరియు కల్పితమని స్పష్టం చేసింది.
అంతర్జాతీయ వాదుల బృందం (Plaintiffs) ఒకటి ఈ కేసు వేస్తూ, కంపెనీ తన వాట్సాప్ చాట్ సర్వీస్ గోప్యత మరియు భద్రత గురించి తప్పుడు వాగ్దానాలు చేస్తోందని ఆరోపించింది. మెటా ‘ఎండ్-టు-ఎండ్’ ఎన్‌క్రిప్షన్‌ను వాట్సాప్ ప్రధాన ఫీచర్‌గా ప్రచారం చేస్తోంది. అంటే మెసేజ్ పంపేవారు, స్వీకరించేవారు తప్ప కంపెనీ కూడా ఆ మెసేజ్‌లను చూడలేదని అర్థం. కానీ ఈ వాదన అబద్ధమని వాదులు అంటున్నారు.
శాన్ ఫ్రాన్సిస్కో కోర్టులో దాఖలైన ఈ ఫిర్యాదులో, మెటా మరియు వాట్సాప్ వినియోగదారుల దాదాపు అన్ని ‘ప్రైవేట్ మెసేజ్‌ల’ను స్టోర్ చేస్తూ విశ్లేషిస్తున్నాయని ఆరోపించారు. ప్రపంచవ్యాప్తంగా ఉన్న బిలియన్ల కొద్దీ వినియోగదారులను కంపెనీ మోసం చేస్తోందని వారు పేర్కొన్నారు.
ఈ ఫిర్యాదుదారుల్లో ఆస్ట్రేలియా, బ్రెజిల్, భారత్, మెక్సికో మరియు దక్షిణాఫ్రికాకు చెందిన వారు ఉన్నారు. మెటా ఉద్యోగులు వినియోగదారుల కమ్యూనికేషన్ డేటాను యాక్సెస్ చేయగలరని, దీనికి ‘విజిల్ బ్లోయర్స్’ (Whistleblowers) సమాచారం ఆధారమని వారు చెప్పారు, అయితే ఆ విజిల్ బ్లోయర్స్ ఎవరనేది స్పష్టం చేయలేదు.
మెటా స్పందన: ఈ ఆరోపణలపై మెటా స్పందిస్తూ, ఈ కేసు పూర్తిగా నిరాధారమైనదని, దీనిపై చట్టపరంగా పోరాడతామని తెలిపింది. వాట్సాప్ మెసేజ్‌లు సురక్షితం కాదనడం హాస్యాస్పదమని మెటా ప్రతినిధి అన్నారు. గత పదేళ్లుగా వాట్సాప్‌లో ‘సిగ్నల్ ప్రోటోకాల్’ ఆధారిత ‘ఎండ్-టు-ఎండ్ ఎన్‌క్రిప్షన్’ ఉందని, దీనివల్ల పంపేవారు, స్వీకరించేవారు తప్ప మరెవరూ మెసేజ్‌లను చదవలేరని వివరించారు.