వాట్సాప్, టెలిగ్రామ్ లాంటి యాప్‌లను ఉపయోగిస్తున్న భారతీయులకు 2027 జనవరి 1 నుంచి కొత్త నిబంధనలు అమల్లోకి రానున్నాయి.
కేంద్ర టెలికమ్యూనికేషన్స్ శాఖ సిమ్ అనుసంధాన నిబంధనల ప్రకారం, ఈ యాప్‌లలో రిజిస్టర్ చేసుకున్న మొబైల్ నంబర్‌కు సంబంధించిన సిమ్ కార్డు, ఆ యాప్‌ను ఉపయోగిస్తున్న పరికరంలో (డివైజ్‌లో) యాక్టివ్‌గా ఉండాలి. ఈ నిబంధనలను అమలు చేయడానికి సంబంధిత సంస్థలకు 2026 డిసెంబర్ 31 వరకు గడువు ఇచ్చారు.
ప్రస్తుతం, వాట్సాప్ లాంటి యాప్‌లలో మొబైల్ నంబర్‌ను ఒకసారి వెరిఫై చేసిన తర్వాత, ఫోన్ నుంచి ఆ సిమ్ కార్డును తీసేసినప్పటికీ కొన్ని సందర్భాల్లో యాప్‌ను అలాగే ఉపయోగించగలుగుతున్నారు. కొత్త నిబంధనల ప్రకారం, రిజిస్టర్ చేసిన నంబర్‌కు సంబంధించిన సిమ్ కార్డు లేనప్పుడు లేదా అది పనిచేయనప్పుడు, ఆ యాప్‌ల వాడకంపై ఆంక్షలు ఎదురుకావచ్చు. కాబట్టి, వేరే ఫోన్‌లో సిమ్ కార్డు పెట్టుకుని వాట్సాప్ ఉపయోగిస్తున్న వారు తమ వినియోగ పద్ధతిని చెక్ చేసుకోవడం అవసరం.
ఈ ఆంక్షలు తీసుకురావడానికి ప్రధాన కారణం ఆన్‌లైన్ మోసాలను అరికట్టడమే. భారతీయ మొబైల్ నంబర్లను ఉపయోగించి, సిమ్ కార్డు లేకుండానే కొన్ని అకౌంట్లను ఆపరేట్ చేస్తూ మోసాలకు పాల్పడుతున్నారని టెలికమ్యూనికేషన్స్ శాఖ తెలిపింది. దీనిని అడ్డుకోవడంతో పాటు నకిలీ గుర్తింపులతో జరిగే మోసాలను సులభంగా కనిపెట్టడమే ఈ నిబంధనల ఉద్దేశం.
ఈ నిబంధనలు వాట్సాప్, టెలిగ్రామ్ మాత్రమే కాకుండా, భారతీయ మొబైల్ నంబర్లను ఉపయోగించే ఇతర కమ్యూనికేషన్ యాప్‌లకు కూడా వర్తిస్తాయి. అయితే, జనవరి 1వ తేదీన వినియోగదారుల ఖాతాలన్నీ బ్లాక్ చేయబడతాయని దీని అర్థం కాదు. రిజిస్టర్ చేసిన సిమ్ కార్డు యాక్టివ్‌గా ఉందా లేదా, అది ఏ పరికరంలో ఉపయోగిస్తున్నారు అనేదాని ఆధారంగా ప్రభావం ఉండవచ్చు. కాబట్టి, వినియోగదారులు తమ ఖాతాకు లింక్ చేయబడిన మొబైల్ నంబర్, సిమ్ కార్డు యాక్టివ్‌గా ఉన్నాయో లేదో నిర్ధారించుకోవాలి.
Leave a Reply