WWE రింగ్‌లా మారిన లోకల్ రైలు.. నడిదారిలో పిడిగుద్దుల వర్షం.. భయంతో వణికిపోయిన ప్రయాణికులు.. వైరల్ వీడియోతో తీవ్ర కలకలం.!!

ముంబై సబర్బన్ లోకల్ రైలులో ప్రయాణిస్తున్న ఇద్దరు ప్రయాణికుల మధ్య కదులుతున్న రైల్లోనే తీవ్ర ఘర్షణ చోటుచేసుకున్న ఘటన తీవ్ర దిగ్భ్రాంతిని కలిగించింది.

రద్దీతో కిక్కిరిసిపోయిన లోకల్ రైలు బోగీలో ఇద్దరు వ్యక్తులు ఒకరిపై ఒకరు విచక్షణారహితంగా దాడి చేసుకుంటున్న దృశ్యాలు ప్రస్తుతం సోషల్ మీడియాలో వైరల్ అవుతున్నాయి. గత 24 గంటల వ్యవధిలోనే ముంబై లోకల్ రైళ్లలో చోటుచేసుకున్న రెండవ హింసాత్మక ఘటన ఇది కావడం గమనార్హం.

ఈ వైరల్ వీడియోలో, విపరీతమైన రద్దీ మధ్య ఇద్దరు వ్యక్తులు మాటామాటా పెరిగి తీవ్ర వాగ్వాదానికి దిగడం, ఆ తర్వాత ఒకరినొకరు పిడిగుద్దులతో బాదుకోవడం స్పష్టంగా కనిపించింది. పరిస్థితి చేయిదాటిపోతోందని గమనించిన తోటి ప్రయాణికులు వెంటనే జోక్యం చేసుకుని వారిద్దరినీ విడదీశారు. అయినప్పటికీ, వారు ఒకరినొకరు అసభ్య పదజాలంతో దూషించుకున్నట్లు సమాచారం. అయితే ఈ ఘర్షణకు గల అసలు కారణం ఏమిటి, ఇది ఏ మార్గంలో వెళ్తున్న లోకల్ రైలులో జరిగిందనే దానిపై పూర్తి వివరాలు ఇంకా వెల్లడి కాలేదు.

ఈ ఘటన జరగడానికి కొన్ని గంటల ముందే, బద్లాపూర్ – సీఎస్‌ఎంటీ (Badlapur – CSMT) మార్గంలో వెళ్తున్న రైలులోని మహిళల బోగీలో ఇద్దరు యువతులు జుట్లు పట్టుకుని కొట్టుకున్న వీడియో బయటకు వచ్చి తీవ్ర సంచలనం సృష్టించింది. వరుసగా జరుగుతున్న ఇలాంటి హింసాత్మక ఘటనలు లోకల్ రైలు ప్రయాణికుల భద్రతపై తీవ్ర ఆందోళనలను రేకెత్తిస్తున్నాయి. సోషల్ మీడియాలో వైరల్ అవుతున్న వీడియో ఫుటేజీల ఆధారంగా గొడవ పడ్డ వ్యక్తులను గుర్తించేందుకు, కారణాలను విశ్లేషించేందుకు రైల్వే పోలీసులు దర్యాప్తు ముమ్మరం చేశారు.