భారత ఇంధన భద్రత దిశగా దేశం ఒక అడుగు ముందుకేసింది. ప్రభుత్వ రంగ సంస్థ అయిన ‘ఆయిల్ ఇండియా లిమిటెడ్’ (OIL), అండమాన్ సముద్ర గర్భంలో భారీ సహజ వాయువు (Natural Gas) నిల్వలను కనుగొంది. ఈ విషయాన్ని కేంద్ర మంత్రి హర్దీప్ సింగ్ పురి సోషల్ మీడియా వేదికగా వెల్లడిస్తూ, ఆయిల్ ఇండియా బృందాన్ని అభినందించారు.
ఎక్కడ దొరికింది? అండమాన్ దీవుల తూర్పు తీరానికి సుమారు 15 కిలోమీటర్ల దూరంలో, సముద్ర మట్టానికి 355 మీటర్ల లోతులో ఉన్న ‘శ్రీ విజయపురం-3’ అనే చమురు బావిలో ఈ వాయువు నిల్వలు గుర్తించబడ్డాయి. సముద్ర గర్భంలో సుమారు 1900 మీటర్లకు పైగా లోతు వరకు డ్రిల్లింగ్ చేసి నిర్వహించిన పరీక్షల్లో ఈ వాయువు లభ్యత స్పష్టమైంది. దీనిపై మరిన్ని వివరాలు తెలుసుకునేందుకు కంపెనీ ప్రస్తుతం శాంపిల్స్ సేకరిస్తోంది.
సముద్ర మంతన్ మిషన్ ప్రాముఖ్యత: ప్రధాని నరేంద్ర మోదీ స్వాతంత్ర్య దినోత్సవం 2025 సందర్భంగా ప్రకటించిన ‘సముద్ర మంతన్ మిషన్’ (నేషనల్ డీప్ సీ ఎక్స్ప్లోరేషన్ మిషన్)లో భాగంగా ఈ అన్వేషణలు జరుగుతున్నాయి. దేశీయంగా హైడ్రోకార్బన్ వనరులను పూర్తిగా వినియోగించుకోవడమే ఈ మిషన్ ప్రధాన లక్ష్యం.
భవిష్యత్తు ప్రణాళిక: అండమాన్ బేసిన్లో ఇప్పటివరకు డ్రిల్లింగ్ చేసిన మూడు బావులలో, రెండింటిలో హైడ్రోకార్బన్ల ఉనికిని గుర్తించడం విశేషం. ఈ విజయం భారత్ యొక్క ఇంధన అన్వేషణ లక్ష్యాలకు ఊతాన్నివ్వడమే కాకుండా, ప్రపంచస్థాయి డీప్ వాటర్ ఎక్స్ప్లోరేషన్ నిపుణులతో కలిసి పనిచేసే అవకాశాన్ని కల్పిస్తుంది. ‘అమృత కాల’ ప్రయాణంలో ఇది దేశానికి ఒక మైలురాయిగా నిలుస్తుందని కేంద్ర మంత్రి పేర్కొన్నారు.