బ్రెజిల్లోని ఒక ఆసుపత్రి నుండి అత్యంత దిగ్భ్రాంతికరమైన వార్త వెలుగులోకి వచ్చింది. 88 ఏళ్ల జురాసి రోజా అల్వెస్ అనే వృద్ధుడు మే 16న శ్వాసకోస సమస్యల (ఊపిరి ఆడకపోవడం) కారణంగా చికిత్స కోసం ఆసుపత్రిలో చేరారు. అయితే, కొన్ని రోజుల చికిత్స అనంతరం ఆయన మరణించినట్లు వైద్యులు ప్రకటించారు.
ఆ తర్వాత అంతిమ సంస్కారాల ప్రక్రియ కోసం ఆయన మృతదేహాన్ని మార్చురీకి (శవాగారానికి) పంపారు. కానీ, అక్కడ అంత్యక్రియల ఏర్పాట్లు జరుగుతుండగా అందరినీ ముక్కున వేలేసుకునేలా చేసిన ఒక అద్భుత ఘట్టం చోటుచేసుకుంది. దీనితో వైద్యులు సైతం ఆశ్చర్యపోయారు. మరి అసలు అక్కడ ఏం జరిగిందో ఇప్పుడు వివరంగా తెలుసుకుందాం.
అసలు ఏం జరిగింది?
88 ఏళ్ల జురాసి రోజా అల్వెస్ అంతిమ సంస్కారాలకు ఏర్పాట్లు జరుగుతుండగా, అక్కడ పనిచేసే ఒక ఉద్యోగి ఆ మృతదేహంలో ఇంకా శ్వాస ఆడుతుండటాన్ని గమనించాడు. వెంటనే ఈ విషయాన్ని ఆసుపత్రి యాజమాన్యానికి తెలియజేశారు. సమాచారం అందుకున్న డాక్టర్లు ఘటనా స్థలానికి చేరుకున్నారు. అంతకుముందు ఆ వృద్ధుడు చనిపోయాడని ధృవీకరించిన వైద్యులు కూడా ఈ తనిఖీల్లో పాల్గొన్నారు. అక్కడ జరుగుతున్నది చూసి వైద్యులు సైతం అవాక్కయ్యారు. ఆ వృద్ధుడి శరీరంలో కదలికలు స్పష్టంగా కనిపించాయి. చనిపోయాడనుకున్న వ్యక్తి ఊపిరి పీల్చుకోవడం చూసి మార్చురీ సిబ్బంది ఒక్కసారిగా షాక్కు గురయ్యారు. ఆ తర్వాత ఆయన్ను అత్యవసరంగా మళ్లీ ఆసుపత్రికి తరలించారు.
అంత్యక్రియలకు ముందే అద్భుతం!
అంత్యక్రియల కేంద్రానికి చెందిన టెక్నికల్ నర్సింగ్ సూపర్వైజర్ జాక్వెలిన్ బ్రోగియాటో స్థానిక మీడియాతో మాట్లాడుతూ.. “మా సిబ్బంది ఎప్పటిలాగే మృతదేహాన్ని తనిఖీ చేశారు. శవాన్ని టేబుల్పై ఉంచినప్పుడు, అతని పొత్తికడుపులో అసాధారణ కదలికలు కనిపించాయి. మొదట అతను ఊపిరి పీల్చుకుంటున్నాడా లేదా అనే విషయమై మాకు స్పష్టత రాలేదు. కానీ అతనిలో జీవకళ (ప్రాణం ఉన్న సంకేతాలు) కనిపించిన వెంటనే, అతని ప్రాణాలను కాపాడటమే మా మొదటి లక్ష్యంగా పెట్టుకున్నాము. అందువల్ల ఎమర్జెన్సీ అంబులెన్స్ సర్వీస్ వచ్చేలోపు నేను అతని శ్వాసనాళాన్ని శుభ్రం చేసి ప్రాథమిక చికిత్స అందించాను. ఆ తర్వాత వైద్యులు వెంటనే అతనికి ఇంట్యూబేషన్ (Intubate – కృత్రిమ శ్వాస గొట్టం అమర్చడం) చేసి, తిరిగి ఆరోగ్య కేంద్రానికి తరలించారు” అని తెలిపారు.
ప్రస్తుతం చికిత్స కొనసాగుతోంది
జురాసి రోజా అల్వెస్ను ప్రస్తుతం అదే ఆసుపత్రిలో చేర్పించి చికిత్స అందిస్తున్నారు, ఎక్కడైతే అతనికి మొదట వైద్యం జరిగిందో. ఈ ఉదంతాన్ని ఉన్నతాధికారుల దృష్టికి తీసుకెళ్లగా, వారు దీనిని తీవ్రమైన వైద్య నిర్లక్ష్యపు (Medical Negligence) కేసుగా నమోదు చేశారు. అయితే, అల్వెస్ను చనిపోయాడని ప్రకటించిన సదరు వైద్యుడి గుర్తింపును పోలీసులు ఇంకా బహిరంగపరచలేదు. ప్రస్తుతం అల్వెస్ పరిస్థితి విషమంగా ఉన్నప్పటికీ స్థిరంగా ఉందని, ఐసీయూ (ICU) లో ఇంట్యూబేట్ చేసిన స్థితిలో చికిత్స పొందుతున్నారని సమాచారం.
ఈ ఘటనపై అల్వెస్ బంధువు ఒకరు మాట్లాడుతూ.. “మా అత్తయ్య అంత్యక్రియలకు అవసరమైన బట్టలు, కాగితాలు తీసుకురావడానికి ఇంటికి వెళ్లారు. అంతలోనే నా కజిన్కు ఒక ఫోన్ వచ్చింది. మృతదేహాన్ని మార్చురీకి తీసుకెళ్లినప్పుడు అక్కడ సిబ్బందికి తాతగారిలో ప్రాణం ఉన్నట్లు తెలిసిందని చెప్పారు. ఆయన ఊపిరి పీల్చుకుంటూ, చేతులు కదుపుతున్నారని తెలిసి మేము ఆశ్చర్యపోయాము. వెంటనే ఆయన్ను మళ్లీ ఆసుపత్రిలో చేర్చారు. ప్రస్తుతం హాస్పిటల్ అడ్మినిస్ట్రేషన్ ఈ వ్యవహారంపై సమగ్ర విచారణకు ఆదేశించింది” అని పేర్కొన్నారు.