ఉత్తరప్రదేశ్ రాష్ట్రం ఘాజీపూర్ ప్రాంతంలో అంతిమ యాత్రకు సిద్ధంగా ఉన్న ఓ వృద్ధురాలి మృతదేహం వద్దకు అకస్మాత్తుగా వచ్చిన ఓ కోతి, ఆమెపై కప్పిన దుప్పటిని తొలగించి విచిత్రంగా ప్రవర్తించిన తీరు చూసేవారిని ఆశ్చర్యానికి గురిచేసింది.
చావు ఇంట్లో నెలకొన్న విషాద వాతావరణంలో ఆ మూగజీవి కనబరిచిన ప్రవర్తన అక్కడున్న వారందరినీ కదలకుండా చేయడమే కాకుండా, ప్రస్తుతం సోషల్ మీడియాలో దావానలంలా వ్యాపించి సంచలనంగా మారింది.
మరణించిన ఆ వృద్ధురాలి అంత్యక్రియల కోసం బంధువులంతా గుమిగూడి తీవ్ర దుఃఖంలో ఉన్న సమయంలో, చెట్టుపై ఉన్న ఒక పెద్ద కోతి అకస్మాత్తుగా పందిట్లోకి దూకింది. అక్కడున్న వారు అరుస్తూ దాన్ని తరిమికొట్టేందుకు ప్రయత్నించినప్పటికీ, వాటిని ఏమాత్రం పట్టించుకోకుండా నేరుగా మృతదేహం వద్దకు వెళ్లింది.
చుట్టుపక్కల వారు ఆశ్చర్యంగా చూస్తుండగానే, ఆ వృద్ధురాలి ముఖాన్ని కప్పి ఉన్న వస్త్రాన్ని సున్నితంగా తొలగించిన ఆ మూగజీవి, తన చేతివేళ్లతో ఆమె ముఖాన్ని తాకుతూ నిమిరింది.
చనిపోయిన ఆ వృద్ధురాలిపై కోతి కనబరిచిన వర్ణించలేని ఈ ప్రేమ, ఆప్యాయతలు అక్కడున్న వారి కళ్లలో నీళ్లు తెప్పించడంతో పాటు, మనుషుల కంటే జంతువులకే ప్రేమ ఎక్కువ ఉందేమో అన్న ఆలోచనను రేకెత్తించింది.
కొద్ది నిమిషాల పాటు మృతదేహం పక్కనే కూర్చుని, ఆ తర్వాత ప్రశాంతంగా అటవీ ప్రాంతంలోకి మాయమైన ఆ జంతువు చేసిన పనికి, అంత్యక్రియల్లో పాల్గొన్న వారంతా భావోద్వేగానికి గురై మాటల్లేక నిలబడిపోయారు.
Leave a Reply