ఒక ప్రముఖ హాస్పిటల్‌లో చేరిన మొదటి రోజే ఒక యువ వైద్యురాలు తన ఉద్యోగానికి రాజీనామా చేసి వార్తల్లో నిలిచారు. రోగులకు హాని కలిగించేలా, నైతికతకు విరుద్ధమైన పద్ధతులను పాటించాలని యాజమాన్యం ఒత్తిడి చేయడమే ఇందుకు కారణమని ఆమె పేర్కొన్నారు.
సోషల్ మీడియా ప్లాట్‌ఫామ్ ‘X’లో ఆమె పోస్ట్ చేసిన వీడియో ఇప్పుడు ఇంటర్నెట్‌లో పెద్ద చర్చకు దారితీసింది.
హాస్పిటల్‌పై తీవ్ర ఆరోపణలు
ఆ వీడియోలో సదరు డాక్టర్ మాట్లాడుతూ.. ఆసుపత్రికి వచ్చే దాదాపు ప్రతి రోగిని, అవసరం లేకపోయినా సరే అడ్మిట్ చేసుకోవాలని యాజమాన్యం కోరినట్లు తెలిపారు. అంతేకాకుండా, బిల్లులు పెంచి ఎక్కువ డబ్బు సంపాదించడం కోసం రోగులను అవసరానికి మించి ఎక్కువ రోజులు ఐసీయూ (ICU)లో ఉంచుతున్నారని ఆమె ఆరోపించారు.
“నేను ఒక ప్రముఖ ఆసుపత్రిలో చేరాను. వారు జీతం కూడా చాలా బాగా ఇస్తున్నారు. కానీ, మొదటి రోజే నాకు అర్థమైంది ఏమిటంటే.. వారికి పేరుకు మాత్రమే ఫిజీషియన్ (Physician) కావాలి, కానీ పద్ధతులు అన్నీ వ్యాపారానికే అని” ఆమె ఆవేదన వ్యక్తం చేశారు.
చికిత్సలో యజమాని జోక్యం
హాస్పిటల్ యజమాని, ఒక సీనియర్ గైనకాలజిస్ట్ అని.. ఆమెనే అన్ని వైద్యపరమైన నిర్ణయాలు తీసుకుంటారని ఆ డాక్టర్ ఆరోపించారు. ఏ పేషెంట్‌ను అడ్మిట్ చేయాలి, ఎవరిని ఐసీయూలో ఎంతకాలం ఉంచాలి అనేది యజమాని నిర్ణయిస్తారని, అందులో వైద్యపరమైన అవసరం ఏమీ ఉండదని ఆమె చెప్పారు. ఈ విధానం తప్పని, రోగుల ప్రాణాలతో ఆడుకోవడమేనని ఆమె పేర్కొన్నారు.
జీతం కంటే విలువలకే ప్రాధాన్యత
అక్కడ జరుగుతున్న అన్యాయాన్ని చూసి చలించిన ఆమె, అదే రోజు రాజీనామా చేయాలని నిర్ణయించుకున్నారు. రోగుల భద్రతను పణంగా పెట్టి సంపాదించే ఉద్యోగం తనకు అవసరం లేదని ఆమె స్పష్టం చేశారు.
“తప్పులు వారు చేస్తారు, కానీ అక్కడ నా పేరు ఉంటుంది. నైతికత లేని పద్ధతుల కోసం నన్ను ఎవరూ వాడుకోనివ్వను” అని ఆమె గట్టిగా చెప్పారు.
నెట్టింట మిశ్రమ స్పందనలు
నైతిక విలువలకు కట్టుబడి రాజీనామా చేసినందుకు చాలా మంది ఆమెను ప్రశంసించారు. ఆమె నిర్ణయం అభినందనీయమని, అయితే వ్యవస్థలో ఇలాంటి మార్పులు ఇంకా చాలా రావాలని కొందరు నెటిజన్లు అభిప్రాయపడ్డారు. ఆమె సొంతంగా క్లినిక్ ప్రారంభించి నిజాయితీగా సేవ చేయాలని మరికొందరు సూచించారు.
మరికొందరు మాత్రం ఆ ఆసుపత్రి పేరు బయటపెట్టాలని డిమాండ్ చేయగా, కొద్దిమంది ఆమె ఆరోపణలను సందేహించారు. కేవలం రాజీనామా చేయడం వల్ల వ్యవస్థ మారదని విమర్శించారు. ప్రైవేట్ వైద్య రంగంలో లాభాపేక్ష కోసం రోగుల సంరక్షణను విస్మరిస్తున్నారనే ఆందోళన ఈ ఘటనతో మరోసారి వ్యక్తమైంది.