“అందరూ వద్దని వారించినా వినకుండా..!” ఉధృతంగా ప్రవహిస్తున్న నదిలోకి బైక్‌తో దిగిన యువకుడు: మరుక్షణంలోనే ఘోరం..

వర్షాకాలంలో ఉద్ధృతంగా ప్రవహిస్తున్న నదిపై ఉన్న వంతెనను దాటబోయి, ఓ యువకుడు తన బైక్‌తో సహా వరద నీటిలో కొట్టుకుపోయిన షాకింగ్ వీడియో సామాజిక మాధ్యమాల్లో వైరల్‌గా మారింది.

వంతెన పైనుంచి వరద నీరు వేగంగా ప్రవహిస్తుండటంతో ప్రమాదాన్ని గుర్తించిన జనం ఇరువైపులా వాహనాలను నిలిపివేసి, నీటిమట్టం తగ్గే వరకు ఎదురుచూస్తున్న సమయంలో ఈ ఘటన చోటుచేసుకుంది.

మిగిలిన ప్రయాణికులంతా వేచి చూస్తున్నప్పటికీ, ఆ యువకుడు మాత్రం తన తొందరపాటుతో బైక్‌ను నేరుగా వంతెనపై పొంగిపొర్లుతున్న వరద నీటిలోకి పోనిచ్చాడు. మొదట్లో సులభంగానే దాటవచ్చని అనుకున్నప్పటికీ, ముందుకు వెళ్లేకొద్దీ నీటి ఉధృతి అతనికి తీవ్ర సవాలుగా మారింది.

ఒకానొక దశలో నీటి ప్రవాహం మరింత పెరిగి, బైక్ అదుపు తప్పడం మొదలైంది. ఆ యువకుడు కాళ్లను కింద పెట్టి బైక్‌ను నిలబెట్టేందుకు ఎంత ప్రయత్నించినప్పటికీ, బలమైన నీటి ప్రవాహం బైక్‌తో పాటు అతడిని కూడా ఒక్క క్షణంలోనే నదిలోకి ఈడ్చుకెళ్లింది.

వంతెనపై ఉన్న జనం ఇది చూసి భయంతో కేకలు వేశారు. అదృష్టవశాత్తూ, అక్కడున్న స్థానికులు క్షణాల్లో ధైర్యంగా స్పందించి, నీటిలో కొట్టుకుపోతున్న ఆ యువకుడిని శ్రమించి క్షేమంగా కాపాడారు. దీంతో అతడు ప్రాణాపాయం నుంచి తృటిలో తప్పించుకున్నాడు.

అయితే, ఆ యువకుడి బైక్ మాత్రం వరద ఉధృతికి కొట్టుకుపోయి కనురెప్పపాటులో నీటిలో మునిగి అదృశ్యమైంది. చిన్నపాటి నిర్లక్ష్యం వల్ల జరిగిన ఈ ప్రమాదకర దృశ్యాన్ని చూసిన నెటిజన్లు.. వరదలు వచ్చే సమయంలో ఇలాంటి సాహసాలకు తెగబడవద్దని హెచ్చరిస్తున్నారు.