తమిళనాడు, సేలం జిల్లా, ఆత్తూరు గాంధీ నగర్కు చెందిన 17 ఏళ్ల బాలిక, అదే ప్రాంతానికి చెందిన శబరి అనే యువకుడిని గత నాలుగేళ్లుగా ప్రేమిస్తున్నట్లు సమాచారం. ఈ క్రమంలో, ఆ బాలికకు కుటుంబ సభ్యులు వేరే వారితో పెళ్లి చేసేందుకు ఏర్పాట్లు చేశారు.
అదే సమయంలో, తన అక్కకు పెళ్లి నిశ్చయమైన వరుడు సదాశివం, తనకు సెల్ఫోన్ ద్వారా అసభ్యకరంగా మెసేజ్లు పంపుతూ లైంగికంగా వేధిస్తున్నాడని ఆ బాలిక తీవ్ర ఆరోపణలు చేసింది. ఈ వేధింపులపై ఫిర్యాదు చేసేందుకు ఆత్తూరు మహిళా పోలీస్ స్టేషన్కు వచ్చిన బాలిక, స్టేషన్కు వచ్చే ముందే ఎలుకల మందు తిని ఆత్మహత్యకు ప్రయత్నించింది. అపస్మారక స్థితిలో ఉన్న బాలికను గమనించిన పోలీసులు, వెంటనే ఆమెను ఆత్తూరు ప్రభుత్వ ఆసుపత్రికి తరలించి, మెరుగైన చికిత్స కోసం సేలం ప్రభుత్వ ఆసుపత్రికి పంపారు.
ఈ ఘటనపై సేలం జిల్లా ఎస్పీ గౌతమ్ విచారణ చేపట్టారు. పోలీస్ స్టేషన్కు వచ్చే ముందే బాలిక విషం తాగిందని ఆయన స్పష్టం చేశారు. బాధితురాలు ఇచ్చిన వాంగ్మూలం ఆధారంగా, రాశిపురానికి చెందిన కాళిముత్తు కుమారుడు సదాశివంపై ‘పోక్సో’ (POCSO) చట్టం కింద కేసు నమోదు చేసినట్లు పోలీసులు తెలిపారు. ప్రస్తుతం బాలిక ఆరోగ్యం నిలకడగా ఉందని వైద్యులు పేర్కొన్నారు.