యూఏఈ-పాకిస్థాన్ అప్పు వివాదం: పాకిస్థాన్ తనను తాను శాంతిదూతగా ఎంతలా చాటుకున్నా, అసలు నిజం ఏంటంటే అది తన ఇంటిని కూడా సరిదిద్దుకోలేని స్థితిలో ఉంది. అంతర్గత కలహాల మాట పక్కన పెడితే, పాకిస్థాన్ ఆర్థిక వ్యవస్థ అత్యంత దారుణమైన స్థితిలో ఉంది.
ఇలాంటి సమయంలో భారత్ మిత్రదేశమైన యూఏఈ, పాకిస్థాన్‌కు గట్టి షాక్ ఇచ్చింది. ప్రపంచానికి శాంతి పాఠాలు చెప్పే ప్రయత్నం చేస్తున్న పాకిస్థాన్‌ను తన అప్పు తీర్చమని యూఏఈ కోరుతోంది. దాదాపు 3 బిలియన్ డాలర్ల అప్పును పొడిగించేది లేదని (No Rollover) యూఏఈ తేల్చి చెప్పడంతో పాకిస్థాన్ దిక్కుతోచని స్థితిలో పడింది. అయితే, ఆ డబ్బు ఎక్కడి నుండి తీసుకురావాలి అని ఆలోచించకుండా, పాకిస్థాన్ నేతలు యూఏఈని ఎద్దేవా చేస్తున్నారు.
పాకిస్థాన్ సెనేటర్ ముషాహిద్ హుస్సేన్ కెమెరా ముందు తన దేశం యొక్క బరితెగింపును ప్రదర్శించారు. ఉల్టా యూఏఈనే ‘పాపం, సహాయం కావాల్సిన స్థితిలో ఉంది’ అంటూ వ్యాఖ్యానించారు. చాలా కాలంగా పాకిస్థాన్‌కు ఆర్థిక సాయం చేస్తూ వస్తున్న దేశం పట్ల పాకిస్థాన్ ఇలా ‘నమ్మకద్రోహి’లా వ్యవహరిస్తోంది. ఒక న్యూస్ ఛానల్ ఇంటర్వ్యూలో హుస్సేన్ మాట్లాడుతూ.. యూఏఈకి డబ్బు అవసరమని, వారు డొనాల్డ్ ట్రంప్‌కు కొన్ని వాగ్దానాలు చేశారని వితండవాదం చేశారు.
యూఏఈ సహాయం – పాకిస్థాన్ వైఖరి: ముషాహిద్ హుస్సేన్ మాట్లాడుతూ.. పాకిస్థాన్ ఇప్పుడు తన పాత అప్పులను తీరుస్తోందని, అవసరమైతే ‘పెద్దన్న’లా యూఏఈకి సహాయం చేస్తామని ప్రగల్భాలు పలికారు. యూఏఈ అభివృద్ధిలో పాకిస్థాన్ పాత్ర ఉందని ఆయన పేర్కొన్నారు. వాస్తవానికి, 2023లో యూఏఈ 1 బిలియన్ డాలర్ల కొత్త అప్పు ఇవ్వడంతో పాటు, మరో 2 బిలియన్ డాలర్ల డిపాజిట్ గడువును పెంచింది. కానీ పాకిస్థాన్ కంగాలీ స్థితిని చూసి, ఇప్పుడు ఆ అప్పును పొడిగించడానికి యూఏఈ నిరాకరించింది. ఈ 3 బిలియన్ డాలర్ల మొత్తం పాకిస్థాన్ విదేశీ మారక నిల్వలలో (Foreign Exchange Reserves) 18% కి సమానం.
వివాదంలో ‘అఖండ భారత్’ ప్రస్తావన ఎందుకు?: అప్పు తీర్చే మార్గం వెతకాల్సింది పోయి, ముషాహిద్ హుస్సేన్ భారత్-యూఏఈ సంబంధాల గురించి మాట్లాడుతున్నారు. యూఏఈ భారత్ పట్ల జాగ్రత్తగా ఉండాలని, అక్కడ కోటి జనాభాలో 43 లక్షల మంది భారతీయులే ఉన్నారని ఆయన అన్నారు. యూఏఈ ఎక్కడ ‘అఖండ భారత్’ ఎజెండాలో భాగమైపోతుందో అని ఆయన హెచ్చరించారు. ఒకవైపు ప్రధాని షెహబాజ్ షరీఫ్ ఐఎంఎఫ్ (IMF) అప్పు కోసం తలవంచక తప్పడం లేదని అంటుంటే, మరోవైపు పాకిస్థాన్ ఎంపీలు మాత్రం ఇలా అతిగా మాట్లాడుతున్నారు.