“అత్యంత అరుదైన పాము అంటే ఇదేనేమో!”.. ఒకే శరీరానికి రెండు తలలు.. అటవీ శాఖ అధికారులనే విస్మయానికి గురిచేసిన విచిత్ర జీవి.. నెట్టింట వైరల్ అవుతున్న ఆశ్చర్యకరమైన వీడియో..!!

గుజరాత్‌లోని దాహోద్ జిల్లా అగస్వానీ గ్రామంలోని ఓ వ్యవసాయ పొలంలో ఎన్నడూ చూడని అత్యంత అరుదైన రెండు తలల పాము ఒకటి వెలుగుచూసింది.

స్థానిక గ్రామస్తుల కంటపడిన ఈ విచిత్రమైన పాము దాదాపు 6 అంగుళాల పొడవు ఉండటంతో పాటు, స్వతంత్రంగా పనిచేసే రెండు ప్రత్యేక తలలు, నాలుగు కళ్లను కలిగి ఉందని అటవీ శాఖ అధికారులు వెల్లడించారు. గుజరాత్‌లో ఇలాంటి వింతైన పాము కనిపించడం ఇదే తొలిసారి కావడంతో, స్థానికులు దీన్ని చూసేందుకు ఎగబడ్డారు. దీనికి సంబంధించిన దృశ్యాలను కొందరు రికార్డ్ చేసి సామాజిక మాధ్యమాల్లో పోస్ట్ చేయడంతో విపరీతంగా వైరల్ అయ్యాయి.

శాస్త్రవేత్తలు, వన్యప్రాణి నిపుణుల వివరాల ప్రకారం.. ఇది ‘వూల్ఫ్ స్నేక్’ (Wolf snake / కట్ల గుజ్జి పాము) జాతికి చెందినదని, వీటికి విషం ఏమాత్రం ఉండదు కాబట్టి మనుషులకు ఎలాంటి ప్రాణాపాయం ఉండదని స్పష్టం చేశారు. అయితే, శాస్త్రీయంగా ‘బైసెఫాలీ’ (Bicephaly) అని పిలిచే ఒక అరుదైన జన్యు లోపం వల్లనే దాదాపు పది లక్షల జీవుల్లో ఒకదానికి ఇలాంటి అసాధారణ శరీర ఆకృతి ఏర్పడుతుందని నిపుణులు వివరించారు. ఒకే శరీరంలో రెండు వేర్వేరు మెదళ్లు ఉండటం వల్ల ఈ పాము సహజంగా కదలడానికి, ఆహారాన్ని వేటాడటానికి లేదా శత్రువుల నుంచి రక్షించుకోవడానికి తీవ్రమైన ఇబ్బందులు ఎదుర్కొంటుందని పేర్కొన్నారు.

ఈ శారీరక లోపం కారణంగా ఇలాంటి ప్రత్యేక జీవులు ప్రకృతిలో ఎక్కువ కాలం జీవించలేవని నిపుణులు ఆందోళన వ్యక్తం చేస్తున్నారు. కాగా సమాచారం అందుకున్న అటవీ శాఖ అధికారులు వెంటనే అక్కడికి చేరుకుని, ఈ అరుదైన రెండు తలల పామును సురక్షితంగా రక్షించారు. బల్లులు, చిన్న కీటకాలను ఆహారంగా తీసుకునే ఈ వింత పాము వీడియో ప్రస్తుతం ఇంటర్నెట్‌లో విపరీతంగా చక్కర్లు కొడుతూ నెటిజన్లతో పాటు శాస్త్రవేత్తల దృష్టిని అమితంగా ఆకర్షిస్తోంది.