ఛతర్‌పూర్ (మధ్యప్రదేశ్): అనుమానం ఓ నిండు సంసారంలో చిచ్చు పెట్టడమే కాదు, ఒక వ్యక్తిని పశువుకంటే హీనంగా మార్చింది. భార్య శీలాన్ని శంకించిన ఒక కిరాతకుడు.. ఆమెను బంధించి, విచక్షణారహితంగా దాడి చేసిన అమానుష ఘటన మధ్యప్రదేశ్ రాష్ట్రంలోని ఛతర్‌పూర్ జిల్లాలో వెలుగుచూసింది.
అసలేం జరిగిందంటే?
బాధితురాలు తన ఇంట్లో ఉన్న సమయంలో, ఒక 18 ఏళ్ల యువకుడు కొన్ని వస్తువులు ఉంచడానికి అక్కడికి వచ్చాడు. అయితే, వారిద్దరి మధ్య ఏదో అక్రమ సంబంధం ఉందంటూ భర్త ఒక్కసారిగా ఊగిపోయాడు. ఎటువంటి విచక్షణ లేకుండా భార్యను ఇంట్లోనే కట్టేసి, కర్రతో చితకబాదాడు.
మర్మాంగాలపై దాడి.. మృత్యువుతో పోరాటం
నిందితుడి పైశాచికత్వం అంతటితో ఆగలేదు. భార్య అని కూడా చూడకుండా ఆమె మర్మాంగాలపై తీవ్రంగా దాడి చేశాడు. ఈ దాడిలో ఆ మహిళ శరీరమంతా తీవ్ర గాయాలయ్యాయి. రక్తపు మడుగులో పడి ఉన్న ఆమెను గమనించిన స్థానికులు వెంటనే జిల్లా ఆసుపత్రికి తరలించారు. ప్రస్తుతం ఆమె పరిస్థితి అత్యంత విషమంగా ఉందని, ప్రాణాపాయ స్థితిలో చికిత్స పొందుతోందని వైద్యులు తెలిపారు.
కొడుకు లాంటి వాడని మొత్తుకున్నా వినకుండా..
బాధితురాలి కుటుంబ సభ్యులు ఈ ఘటనపై కన్నీరుమున్నీరవుతున్నారు. “సదరు యువకుడు ఆ మహిళకు కొడుకు లాంటి వాడని, కేవలం ఇంటి సామాగ్రి పెట్టడానికి మాత్రమే వచ్చాడని” వారు మొత్తుకుంటున్నారు. కానీ, అనుమానంతో కళ్లు మూసుకుపోయిన భర్త ఈ దారుణానికి ఒడిగట్టాడు.
పోలీసుల వేట ప్రారంభం
ఈ అమానుష ఘటనపై కేసు నమోదు చేసిన పోలీసులు దర్యాప్తును వేగవంతం చేశారు. నిందితుడు ప్రస్తుతం పరారీలో ఉన్నాడని, అతడిని పట్టుకోవడానికి ప్రత్యేక బృందాలను ఏర్పాటు చేసినట్లు పోలీసులు తెలిపారు. బాధితురాలి మెడికల్ రిపోర్ట్ అందిన తర్వాత నిందితుడిపై మరిన్ని కఠిన సెక్షన్లు నమోదు చేస్తామని వెల్లడించారు.
సభ్య సమాజం తలదించుకునేలా జరిగిన ఈ ఘటన స్థానికంగా తీవ్ర కలకలం రేపింది.