న్యూఢిల్లీ: భారత యువ ఓపెనర్ అభిషేక్ శర్మ టీ20 వరల్డ్ కప్ 2026లో ఆశించిన స్థాయిలో రాణించకపోయినా, కీలకమైన ఫైనల్ మ్యాచ్‌లో మాత్రం తన విశ్వరూపాన్ని ప్రదర్శించాడు. ఐసీసీ టీ20 ర్యాంకింగ్స్‌లో నంబర్ వన్ స్థానంలో ఉన్న అభిషేక్ నుండి టోర్నీ ఆరంభం నుండి భారీ అంచనాలు ఉన్నప్పటికీ, ఫైనల్‌కు ముందు కేవలం ఒక్క అర్ధ సెంచరీ మాత్రమే చేయగలిగాడు.
కానీ, అహ్మదాబాద్‌లోని నరేంద్ర మోదీ స్టేడియంలో న్యూజిలాండ్‌తో జరిగిన ఫైనల్‌లో మాత్రం అభిషేక్ పాత లయను అందుకున్నాడు. కేవలం 18 బంతుల్లోనే హాఫ్ సెంచరీ పూర్తి చేసి సంచలనం సృష్టించాడు. ఈ నేపథ్యంలో ఆస్ట్రేలియా మాజీ వికెట్ కీపర్ బ్రాడ్ హడిన్ అభిషేక్ శర్మను ఉద్దేశించి ఆసక్తికర వ్యాఖ్యలు చేశారు.
అభిషేక్ శర్మ ఒక ‘రాస్కల్’ (నవ్వుతూ..)
బ్రాడ్ హడిన్ అభిషేక్ బ్యాటింగ్‌ను ప్రశంసిస్తూనే, సరదాగా అతడిని ‘రాస్కల్’ (బద్మాష్) అని సంబోధించారు. “నేను అభిషేక్ శర్మకు పెద్ద అభిమానిని. టోర్నీ అంతా అతని ఫామ్ గురించి చర్చ జరిగింది. గ్రూప్ మ్యాచ్‌ల్లో వరుసగా సున్నా పరుగులకే అవుట్ అవ్వడంతో అతను ఒత్తిడిలో ఉన్నాడని అందరూ అనుకున్నారు. కానీ, ఇలాంటి పెద్ద మ్యాచులకే అభిషేక్ లాంటి ఆటగాళ్లు అవసరం. ఎందుకంటే వారు రిస్క్ తీసుకోవడానికి ఏమాత్రం భయపడరు” అని హడిన్ పేర్కొన్నారు.
మరింతగా వివరిస్తూ.. “అభిషేక్ టోర్నీ మొదట్లో ఫ్లాప్ అయి ఉండవచ్చు, కానీ ఫైనల్ లాంటి అతిపెద్ద మ్యాచ్‌లో మాత్రం అతను ఒక ‘రాస్కల్’లా మారిపోయాడు. ప్రత్యర్థి జట్టును ఒత్తిడిలోకి నెట్టడమే అతని పని, ఫైనల్‌లో అతను సరిగ్గా అదే చేశాడు” అని హడిన్ కొనియాడారు.
మెరుగైన జట్టే గెలిచింది!
న్యూజిలాండ్ జట్టు ఫైనల్ చేరడంపై హడిన్ అభినందనలు తెలిపారు. “న్యూజిలాండ్ అద్భుతంగా ఆడింది. టిమ్ సీఫెర్ట్, ఫిన్ అలెన్ ఫామ్‌లో ఉండటంతో అంతా వారి వైపే ఉన్నట్టు అనిపించింది. కానీ, చివరి అడ్డంకిని అధిగమించడంలో వారు విఫలమయ్యారు. ఫైనల్‌లో అత్యుత్తమంగా ఆడిన జట్టు (భారత్) వరల్డ్ కప్ గెలుచుకుంది” అని ‘విల్లో టాక్ క్రికెట్’లో మాట్లాడుతూ హడిన్ తన అభిప్రాయాన్ని పంచుకున్నారు.