అంతర్జాతీయ మార్కెట్లో అమెరికన్ డాలర్ ఆధిపత్యాన్ని తగ్గించే అంశంపై ‘బ్రిక్స్’ (BRICS) కూటమిలో చర్చ మళ్లీ జోరందుకుంది.
భారత్ అధ్యక్షతన జరగనున్న 2026 బ్రిక్స్ శిఖరాగ్ర సదస్సుకు ముందే.. చైనా, రష్యాలతో సహా ఇతర సభ్య దేశాలు అంతర్జాతీయ వాణిజ్యంలో స్థానిక కరెన్సీల వినియోగాన్ని పెంచడంపై ప్రత్యేక దృష్టి సారించాయి. అమెరికన్ డాలర్‌ను పూర్తిగా పక్కనపెట్టేలా ఉమ్మడి కరెన్సీని తీసుకురావడం తక్షణ లక్ష్యం కానప్పటికీ, డాలర్‌పై ఆధారపడే విధానాన్ని క్రమంగా తగ్గించేందుకు తీవ్ర ప్రయత్నాలు సాగుతున్నాయి.
అంతర్జాతీయ వాణిజ్యంలో యువాన్ వినియోగాన్ని పెంచేందుకు చైనా ఎప్పటినుంచో ప్రయత్నిస్తోంది. అదేవిధంగా, పాశ్చాత్య దేశాల ఆర్థిక ఆంక్షలను ఎదుర్కొంటున్న రష్యా కూడా తన విదేశీ వ్యాపారంలో రూబుల్‌తో పాటు ఇతర స్థానిక కరెన్సీల వాడకాన్ని భారీగా పెంచింది. ఈ పరిణామాల నేపథ్యంలో, బ్రిక్స్ దేశాల మధ్య డాలర్‌తో నిమిత్తం లేకుండా వ్యాపారం సాగించడంపై ప్రపంచ దేశాల దృష్టి పడింది. అయినప్పటికీ, డాలర్‌ను ఒక్కసారిగా పూర్తిగా వదిలేయడం తమ ఉద్దేశం కాదని రష్యా సైతం స్పష్టం చేసింది.
ఈ సమయంలో భారతదేశ వైఖరి అత్యంత కీలకమైనదిగా మారింది. డాలర్‌ను రాత్రికి రాత్రే పూర్తిగా పక్కన పెట్టేయడానికి బదులుగా.. బ్రిక్స్ దేశాల మధ్య ఆయా దేశాల స్థానిక కరెన్సీలలోనే ద్వైపాక్షిక వాణిజ్యం సాగించేందుకు, సరిహద్దు డిజిటల్ లావాదేవీలను సులభతరం చేసేందుకు భారత్ ప్రాధాన్యతనిస్తోంది. ముఖ్యంగా బ్రిక్స్ దేశాల సెంట్రల్ బ్యాంకుల డిజిటల్ కరెన్సీలను అనుసంధానించే ప్రతిపాదనను భారత్ ముందుకు తెచ్చినట్లు సమాచారం.
సెప్టెంబర్ 12, 13 తేదీల్లో న్యూఢిల్లీలో జరగనున్న బ్రిక్స్ సదస్సులో ఈ అంశంపై ప్రధానంగా చర్చ జరిగే అవకాశం ఉంది. అదే సమయంలో, భారత్-చైనా మధ్య వాణిజ్య సమతుల్యత, భద్రతాపరమైన ఆందోళనలు వంటి అనేక చిక్కులు ఉన్నందున డాలర్‌కు ప్రత్యామ్నాయంగా ఉమ్మడి కరెన్సీని తీసుకురావడం తక్షణమే సాధ్యం కాకపోవచ్చని నిపుణులు విశ్లేషిస్తున్నారు. కాబట్టి “డాలర్‌కు పూర్తిగా గుడ్ బై” చెప్పడం కంటే, దానిపై ఆధారపడటాన్ని దశలవారీగా తగ్గించుకోవడమే బ్రిక్స్ దేశాల ప్రస్తుత వ్యూహంగా కనిపిస్తోంది.